Eńbek mınıstri zańsyz kóshi-qonmen kúresýdiń tártibin túsindirdi
Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine kóshi-qon protsesterin retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Syrtqy eńbek kóshi-qon salasyna qatysty ózgeristerge toqtalsaq, birinshiden, sheteldik jumys kúshin tartý rásimin jetildirý maqsatynda sheteldik jumys kúshin tartýǵa ruqsattyń áreketin basqa ákimshilik aýmaqtyq birlikterge taratý kózdeledi. Bul jerde ol eki aımaqqa alǵan ruqsattama úshin sol eki aýmaqqa da salyq alymyn tóleýge mindetti bolady. Ekinshiden, sheteldik jumys tartýǵa kvotany ekonomıkalyq qyzmet túrlerine bólmeı, qyzmetkerler sanaty kategorııalar bólinisinde begileý usynylady. Sonymen qatar, eńbek naryǵyndaǵy qajettiligine jedel den qoıý úshin Úkimettiń sheteldik jumys kúshin tartýǵa arnalǵan kvotany belgileý jónindegi fýnktsııalaryn halyqty jumyspen qamtý máseleleri jónindegi ýákiletti organǵa, ıaǵnı Eńbek mınıstrligine berý usynylady», - dedi mınıstr.
Budan bólek, B. Nurymbetov kóshi-qon protsesteri salasyndaǵy quqyqtyq bazany keńeıtý jáne zańsyz kóshi-qonnyń jolyn kesý maqsatyndaǵy qadamdarǵa toqtaldy.
Osy oraıda, ulttyq zańnamada readmıssııaǵa arnalǵan quqyqtyq negizderdiń joqtyǵynan, ulttyq zańnamaǵa readmıssııa jónindegi halyqaralyq erejelerdi engizý usynylǵan. Sondaı-aq atqarýshylyq is júrgizý boıynsha bereshegi bar adamdardyń ketýine shekteýler kózdelgen tolyqtyrýlar engizý, sheteldikter úshin turaqty turýǵa ruqsat berý úshin 4 AEK mólsherinde memlekettik bajdy engizý eskerilgen.
Budan buryn habarlanǵandaı, zań jobasynda Qazaqstanǵa kelgen etnıkalyq repatrıanttar men qonys aýdarýshylar úshin qolaıly jaǵdaılar jasaý eskerilgen.