Eńbek mınıstri memqyzmet kórsetýdiń proaktıvti formatyn keńeıtedi

ASTANA. QazAqparat – Eńbek jáne halyqty áleýmettik qorǵaý mınıstrligi memlekettik qyzmet kórsetýde jumystyń proaktıvti formatyn keńeıtedi. Bul týraly Eńbek jáne halyqty áleýmettik qorǵaý vıtse-mınıstri Oljas Ordabaev aıtty, dep habarlaıdy QazAqparat tilshisi.

«Proaktıvti formattyń máni mynada. Eger buryn azamat qandaı da ómirlik jaǵdaıda qyzmet alý úshin memleketke baratyn bolsa, endigi ýaqytta bul ádisti ózgertemiz. Endi memlekettik túrli derekter bazasynyń, aqparattyq júıelerdiń arqasynda memleket adamda qandaı da bir ómirlik jaǵdaı oryn alǵanyn kóredi jáne azamattyń kelgenin kútpeıdi. Proaktıvti formatta onymen baılanysqa shyǵyp, belgili bir tólemdi, qandaı da bir qoldaý is-sharasyn alýǵa quqyǵy bar ekenin habarlaıdy. ıAǵnı, bul oraıda biz ádisti ózgertemiz. Osynaý proaktıvti ádis fılosofııasyn keńeıtetin bolamyz. Biz úshin eshkimniń de memlekettik qoldaý is-sharasynan tys qalyp qoımaýy mańyzdy», - dedi Oljas Orbaev BAQ ókilderimen kezdesýi barysynda.

Al Eńbek resýrstaryn damytý ortalyǵynyń basshysy Dáýlet Arǵandyqov búginde bul jumysqa 24 aqparattyq júıe qoldanylatynyn aıtady. Olar túrli kórsetkishtiń negizinde adamnyń jaǵdaıyn, problemasyn jáne qandaı qoldaý is-sharasyna muqtaj ekendigin anyqtaıdy.

«Adamnyń telefonyna sms-habarlama keledi. Máselen, eger adamnyń balasy dúnıege kelse ne jumysynan aırylyp qalsa, onda oǵan habarlama keledi. Eger ol kelisim berse, onda bank málimetterin engizedi. Osydan keıin avtomatty túrde esepteý bolyp, qarajat aǵymdaǵy esepshotyna túsedi. Barlyǵy óte qarapaıym», - dedi ortalyq basshysy.

Aıta keterligi, búginde 14 myńnan astam adam proaktıvti formatta kómek alyp úlgerdi. Aldaǵy ýaqytta bul baǵyttaǵy jumys keńeıtile túspek. Sms-habarlama mindetti túrde 1414 nómirinen kelýi tıis.