Eńbek mınıstri eńbek shartyn esepke alýdyń biryńǵaı júıesi týraly aıtty
NUR-SULTAN. QazAqparat – Búginde elimizde 6 mln 600 myń jaldamaly jumysker bar. Bul týraly Parlament Májilisinde QR Eńbek jáne halyqty áleýmettik qorǵaý mınıstri Birjan Nurymbetov málim etti, dep habarlaıdy QazAqparat tilshisi.
«Eńbek qatynastaryn retteýdiń qazaqstandyq modeli jumys berýshiler men jumysshylar múddeleriniń tıimdiligin jáne áleýmettik dıalogty qamtamasyz etýi qajet. Búginde elimizde 6 mln 600 myń jaldamaly jumysker, 300 myńǵa jýyq jumys istep turǵan kásiporyn, sondaı-aq 696 kásipodaq bar. Dúnıejúzilik ekonomıkalyq forýmnyń jahandyq básekege qabilettik eńbek reıtınginde eńbek jaǵdaıyn sıpattaıtyn komponent boıynsha 2019 jyly Qazaqstan 140 memlekettik ishinde 25-shi oryndy ıelenip otyr», - dedi mınıstr «Qazaqstan Respýblıkasynyń keıbir zańnamalyq aktilerine eńbek máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Osy oraıda B. Nurymbetov bul zań jobasy eńbek qatynastaryn, áleýmettik seriktestikti, qaýipsizdik jáne eńbekti qorǵaý máselelerin retteýge baǵyttalǵanyn atap ótti.
«Zań jobasyndaǵy eńbek qatynastaryn retteý salasyna qatysty negizgi ózgeristerge toqtalsaq, eńbek sharttaryn jasasý jáne esepke alý protsesin avtomattandyrý maqsatynda «eńbek shartyn esepke alýdyń biryńǵaı júıesi» degen uǵym engizilip otyr. Atalǵan shara jumyskerlerdiń eńbek ótilin, biliktiligin, jumys ornyn rastaý tártibin jeńildetýge, jumysker týraly rastalǵan aqparat alýǵa jáne saqtalýyn qamtamasyz etýge múmkindik beredi. Búgingi tańda mınıstrlik iske asyryp otyrǵan qanatqaqty joba aıasynda 23 762 mekeme jasalǵan eńbek sharttary týraly 1 mln 220 myńnan astam málimet engizdi», - dedi Birjan Nurymbetov.
