Eńbek mınıstri elektrondyq bırjanyń múmkindikterin atady
ASTANA. QazAqparat - Búgin Májiliste ótken jumyspen qamtý máselelerine arnalǵan parlamenttik tyńdaýda QR Eńbek jáne halyqty áleýmettik qorǵaý mınıstri Mádına Ábilqasymova Elektrondyq eńbek bırjasynyń jańa múmkindikterin aıtyp berdi, dep habarlaıdy QazAqparat.
«Eńbek naryǵynda azamattardyń utqyrlyǵyn arttyrý jáne olardy turaqty jumyspen qamtý úshin eńbek naryǵynyń ınfraqurylymyn keń aýqymdy jańǵyrtý júrgizildi. Eki naqty joba iske asyryldy. Birinshi joba - 2018 jylǵy 1 qańtardan bastap engizilgen Elektrondyq eńbek bırjasy. Bırja - bul elimizdegi alǵashqy tsıfrlyq alań jáne vakansııalar men túıindemelerdiń eń iri banki. Oǵan 200 jumyspen qamtý ortalyǵynyń barlyǵy, 48 jeke agenttik, 4 buqaralyq aqparat quraly, 6 onlaın-alań qosyldy. Búginde bırjada 48 myń vakansııa men 77 myń túıindeme bar. 280 myńnan astam azamat Eńbek bırjasy arqyly jumysqa ornalastyryldy», - dedi mınıstr.
Bırjany odan ári damytý - onyń bazasynda elektrondyq eńbek sharttaryn jasaýdy kózdeıdi. Sonymen qatar, bırja kásiptik oqytý alańyna aınalady. Onda jumys berýshiler qajetti kadrlar týraly, al bilim berý uıymdary oqytý kýrstary týraly málimdeı alady.
Budan buryn habarlanǵandaı, Mádına Ábilqasymova ózin-ózi jumyspen qamtyǵan azamattarǵa qatysty jaǵdaı boıynsha túsinik berdi.
