Eńbek mınıstri dollar baǵamynyń ósýine oraı qandaı qadamdar jasalatynyn aıtty

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Serik Shápkenov ınflıatsııaǵa baılanysty Qazaqstanda jalaqyny kóterý múmkindigi týraly suraqqa jaýap berdi, dep habarlaıdy QazAqparat tilshisi.

Májiliste tilshiler Eńbek mınıstrinen «dollar baǵamynyń ósýi saldarynan eldegi taýarlar qymbattaıtynyn, osy oraıda qazaqstandyqtardyń jalaqysy óse me?» dep surady.

Óz kezeginde vedomstvo basshysy halyqtyń tabysyn arttyrýǵa qatysty Prezıdent tapsyrma bergenin eske saldy.

«Bizdiń mınıstrlik osy baǵytta jergilikti atqarýshy organdarmen, kásiporyndarmen tıisti jumysty bastap ketti. Tıisti taldaý jumystary arqyly tómen jalaqy deńgeıi barlar anyqtalady. Bul turǵyda jumys berýshiler qaramaǵynda jumys istep júrgen adamdardyń jalaqysyn kóterýi úshin tıisti qadamdardy júrgizip jatyrmyz. Jumys berýshiler ózderinde isteıtin qyzmetkerlerdiń jaǵdaıyn túsinip, qoldaý jasaýy kerek», - dedi S. Shápkenov.

Sonymen qatar mınıstr dollar baǵamynyń ósýiniń saldaryna jáne jalaqyny kóterýge qatysty qandaı jumystar atqarylatynyn aıtty.

«Biz Ulttyq ekonomıka mınıstrligimen birlese ekonomıkanyń ary qaraı ilgerilýi turǵysynda iske asyrylatyn qadamdardy pysyqtap jatyrmyz. Osy oraıda tıisti sheshimder qabyldanady dep oılaımyn», - dedi S. Shápkenov.