Eńbek mınıstri bıyl qansha jumys orny ashylatynyn aıtty
ASTANA. QazAqparat - Bıyl 600 myńǵa jýyq jumys orny qurylady. Bul týraly QR Eńbek jáne halyqty áleýmettik qorǵaý mınıstri Mádına Ábilqasymova málim etti, dep habarlaıdy QazAqparat.
Aıta keteıik, Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly» zań jobasy talqylanyp, birinshi oqylymda maquldandy.
«Nátıjeli jumyspen qamtý jáne jappaı kásipkerlikti damytý baǵdarlamasy, sondaı-aq ózge de memlekettik-salalyq baǵdarlamalar aıasynda tek bıyldyń ózinde 571 myń jumys ornyn qurýdy josparlap otyrmyz. Bul osy sanatta eńbekpen qamtýdyń mindetti sharalary. Birinshi kezekte biz jumyssyzdar nemese ónimsiz jumyspen qamtylǵandar úshin jaǵdaı jasaýǵa kúsh saldyq», - dedi mınıstr Májiliste tilshilerdiń saýalyna jaýap berý kezinde.
Osy oraıda ol jumysshylardyń otbasylarymen birge kóshi-qonýyna, baspanany jaldaýǵa tólenetin sýbsıdııa túrindegi memlekettik qoldaýǵa qosa, taǵy bir kómektiń jańa túri qarastyrylǵanyn jetkizdi. Bul turǵyda jumys berýshige sýbsıdııa usynylady.
«Onyń kólemi 1 mln teńge shamasynda. Eger de jumys berýshi eńbek kúshi artyq óńirden jumyskerler tapshy aımaqqa aýysatyn adamdardy qyzmetke alsa, onda oǵan atalǵan sýbsıdııa beriledi. Bul turǵyda ol qarjyny baǵdarlamaǵa qatysqan adamnyńjumysqa ornalasýyna tolyqtaı jumsaýy kerek», - dedi vedomstvo basshysy.
Onyń paıymynsha, memlekettik baǵdarlamalar eldegi bilikti mamandardy saqtap qalýǵa múmkindik beretin bolady.
«Mamandardyń ketýdiń tıisti deńgeıin baıqap otyrmyz, alaıda jalpy Qazaqstanda kóshi-qonnyń ońtaıly saldosy saqtalýda. Bul qalypty protsess. Sondyqtan elimizdegi baǵdarlamalar sapaly jumys oryndaryn qurý úshin júzege asyrylyp jatyr», - dedi Ábilqasymova.
