Eńbek mınıstri áıelder men erlerdiń zeınetke shyǵý jasyn teńestirýdi usynady
ASTANA. 12 naýryz. QazAqparat - Eńbek jáne halyqty áleýmettik qorǵaý mınıstrligi zııandy óndiristerde jumys isteıtinder úshin mindetti kásibı zeınetaqy tólemderin engizýdi, sondaı-aq áıelderdiń zeınetke shyǵý jasyn bir qalypqa túsirip, sáıkestendirýdi usynady. Budan bólek, áıelderdiń bala kútimi kezeńinde joǵaltqan mindetti zeınetaqy jarnalaryn sýbsıdııalaý qarastyrylýda. Búgin QR Parlamenti Májilisinde «Qazaqstan Respýblıkasyndaǵy zeınetaqymen qamsyzdandyrý týraly» jańa redaktsııadaǵy zań jobasyn tanystyrǵan Eńbek jáne halyqty áleýmettik qorǵaý mınıstri Serik Ábdenov osylaı málim etti.
Mınıstrdiń aıtýynsha, Qazaqstanda 1,8 mln. zeınetkerdiń 1 mln. 253 myńy nemese 70 paıyzy áıelder bolyp otyr. «Alaıda jeke zeınetaqy shottarynyń jalpy sanyndaǵy áıelder úlesi 3,8 mln.-dy nemese 45 paıyzyn quraıdy. Áıelderdiń zeınetaqy jınaqtarynyń ortasha kólemi erlerge qaraǵanda 25 paıyzǵa tómen. Áıelderdiń zeınetaqy jınaqtarynyń az bolýy birinshiden, bala týýǵa qatysty demalysta bola otyryp, zeınetaqy jınaqtaý júıesine qatysý ýaqytynyń az bolýyna baılanysty. Ekinshiden, olardyń az jınaǵy erlermen salystyrǵanda zeınetke erte shyǵýlaryna baılanysty bolyp otyr», - dedi S. Ábdenov. Sonymen qatar, mınıstr eńbekaqy tóleýdegi genderlik aıyrmashylyqqa da toqtalyp ótti. Onyń aıtýynsha, sońǵy 5 jylda áıelderdiń ortasha aılyq jalaqysynyń mólsheri erlerdiń ortasha aılyq jalaqysynyń 66-68 paıyzyna deıin quraıdy. «Zeınetke shyqqannan keıingi ómir súrý kezeńine nazar aýdaratyn bolsaq, áıelder erlerden uzaǵyraq ómir súredi. Budan bólek, áıelderdiń 17 paıyzdan astamynyń zeınetaqy júıesiniń yntymaqty júıege tolyq qatysý ótili joq, al 2018 jyldan bastap bul barlyq áıelderdi qamtıdy. Demek, yntymaqty zeınetaqynyń kólemi eń tómengi zeınetaqydan da tómen bolady. Sonymen qatar, júktilik boıynsha jáne 1 jasqa deıin bala kútimi boıynsha demalysta bolǵan ýaqytynda áıelderdiń mindetti zeınetaqy tólemderi boıynsha shyǵyndaryn sýbsıdııalaý máselesi qaralyp jatyr», - dedi mınıstr.
