Eńbek mınıstri «ArselorMıttal Temirtaý» ujymyna Prezıdent Joldaýyn túsindirdi

QARAǴANDY. QazAqparat - QR Premer-Mınıstriniń orynbasary Berdibek Saparbaevtyń Qaraǵandy oblysyna jumys sapary aıasynda QR Eńbek jáne halyqty áleýmettik qorǵaý mınıstri Birjan Nurymbetov «ArselorMıttal Temirtaý» AQ-ǵa baryp, QR Prezıdenti Qasym-Jomart Toqaevtyń Qazaqstan halqyna Joldaýynyń negizgi baǵyttaryn túsindirdi. Bul týraly QazAqparat Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.

«Arselor Mıttal» AQ basshylyǵymen jáne qyzmetkerlerimen kezdesý barysynda Birjan Nurymbetov Memleket basshysy Joldaýda QR Úkimetine jumys berýshilerdi jalaqy qoryn ulǵaıtýǵa yntalandyrý múmkindigin qarastyrýdy tapsyrǵanyn eske saldy. Sebebi iri taý-ken kompanııalarynyń tabystary ósip keledi, biraq bul jaǵdaı azamattardyń jalaqysyna aıtarlyqtaı áser etpeýde», - dep atap ótti mınıstr.

Sondaı-aq mınıstr eńbek zańnamasyn saqtaý men óndiristik jaraqattanýdyń aldyn alýǵa basa nazar aýdardy.

«Eńbek zańnamasyn saqtaý kez kelgen kásiporynnyń turaqtylyǵy men tabystylyǵynyń kepili bolyp tabylady. Ókinishke oraı, respýblıka boıynsha jalaqy jáne mindetti zeınetaqy jarnalary men áleýmettik aýdarymdar boıynsha bereshekter bar. Óndiriste 749 adam zardap shekti, onyń ishinde 82 adam qaıtys boldy. Jumys berýshiler jalaqyny ýaqtyly tóleýin jáne óndiristegi qaýipsizdik tehnıkasynyń naqty saqtalýyn qamtamasyz etýi qajet», – dedi Birjan Nurymbetov.

QR Eńbek mınıstrliginiń basshysy jumys berýshiler jumys oryndaryn saqtap qalýǵa jáne ujymdyq eńbek daýlarynyń aldyn alýǵa bar kúsh-jigerin salýy kerektigin basa aıtty.

«Ókinishke oraı, respýblıka boıynsha 2,4 myń qyzmetker qysqardy. Jumys oryndary men qyzmetkerlerdiń tabystaryn saqtaý azamattardyń ál-aýqatynyń kepili bolyp tabylady. Sondyqtan bizdiń mınıstrlik bul máselelerdi eńbek daýlaryn boldyrmaý úshin turaqty baqylaýda ustaıdy. Jumys berýshiler men qyzmetkerler arasyndaǵy ózara qarym-qatynasty retteýdiń basty quraly – ujymdyq sharttar bolyp tabylady. Búgingi kúni ujymdyq sharttar elimizdiń iri jáne orta kásiporyndarynyń jalpy sanynyń 96,6%-ynda jasaldy, onda qyzmetkerler úshin qosymsha áleýmettik paket qarastyrylǵan. Bul tájirıbeni shaǵyn kásiporyndarda da engizý qajet», – dep atap ótti vedomstvo basshysy.