Eńbek mınıstri óziniń qansha zeınetaqy alýy múmkin ekenin aıtty

ASTANA. KAZINFORM — Senat kýlýarynda jýrnalıster Eńbek jáne halyqty áleýmettik qorǵaý mınıstri Svetlana Jaqypovadan dál qazir zeınetke shyqsa qansha zeınetaqy alýy múmkin ekenin surady. 

— Men 3 túrli tólem alar edim. Óıtkeni jumys ótilim 1998 jyldan buryn bastalǵan. 16 jastan bastap, 10-synyptan keıin jumys istedim. Sáıkesinshe mende BJZQ-da jınaqtalǵan aqsha men bazalyq zeınetaqy bar, — dedi vedomstvo basshysy.

Mınıstr bul tólemniń aqshaǵa shaqqandaǵy somasy qansha bolatynyn eseptep kórmegenin aıtty.

— Somasyn eseptep kórmeppin. Biraq báriniki sııaqty bolady. Dál búgin zeınetke shyqsam, bazalyq zeınetaqym mınımaldy bolar edi — 32 myń teńgeniń shamasynda. Al bazalyq zeınetaqynyń ortasha mólsheri 47 myń teńge, — dedi Svetlana Jaqypova.

Buǵan deıin Eńbek jáne halyqty áleýmettik qorǵaý mınıstrligi halyqty jumyspen qamtýǵa bólingen 70 mlrd teńge bıýdjetke keri qaıtarýdy josparlap otyrǵanyn jazǵan edik.