Eńbek mınıstri: Áleýmettik tólemdi naqtylaý — bıýdjetti únemdeý emes
ASTANA. KAZINFORM — Áleýmettik tólem alýshylardy sanattarǵa bólý bıýdjet qarajatyn únemdeýdi emes, muqtaj azamattarǵa kórsetiletin kómekti arttyrýdy kózdeıdi. Bul pikirdi Eńbek jáne halyqty áleýmettik qorǵaý mınıstri Asqarbek Ertaev aıtty.
Mınıstrdiń aıtýynsha, jańa ádisteme áleýmettik qoldaýdy shyn máninde muqtaj adamdarǵa baǵyttaýǵa jáne olarǵa qajetti kómekti tolyq kólemde, ýaqytyly kórsetýge múmkindik beredi.
— Munyń bıýdjetke esh qatysy joq. Bul — Áleýmettik kodeks aıasynda muqtaj azamattarǵa kórsetiletin kómektiń ataýlylyǵyn kúsheıtýge baǵyttalǵan jumys. Árbir muqtaj azamatqa memlekettik qoldaý kórsetip, der kezinde tolyqqandy kómek berýdi kózdep otyrmyz. Bul úshin bıýdjet qarajaty jetkilikti, — dedi Asqarbek Ertaev.
Onyń sózinshe, áleýmettik tólem alýshylardyń ál-aýqatyn baǵalaý halyqaralyq sarapshylardyń usynystary negizinde ázirlengen. Eńbek mınıstrligi 2023 jylǵa deıin BUU Damý baǵdarlamasynyń (BUUDB) ókilderimen birlesip jumys istegen.
— Qazir A sanatynda 77 myń adam, V sanatynda 475 myń adam barlyǵymen birdeı áleýmettik járdemaqy alyp otyr. Jalpy 3,2 mln adam áleýmettik tólem alsa, solardyń 550 myńy A jáne V sanattaryna jatqyzylǵan. Qalǵan 2,7 mln-ǵa jýyq adam S, D jáne E sanattaryna kiredi. Aldaǵy ýaqytta osy sanattardaǵy azamattarǵa áleýmettik qoldaýdy kúsheıtý joldaryn qarastyramyz, — dedi Asqarbek Ertaev.
Eske sala ketsek, endi er adam dekretke shyqsa da, járdemaqy áıelge beriledi.
Balasy 1,5 jasqa tolmaı jumysqa shyqqan analardyń járdemaqysy saqtalady.
Bul rette jalpy 36 járdemaqynyń 22-si ózgerissiz qalady.
