«Eńbek» memlekettik baǵdarlamasy jańa baǵytpen tolyqty

NUR-SULTAN. QazAqparat - Elbasy Nursultan Nazarbaevtyń «Nur Otan» partııasynyń XVIII sezinde bergen tapsyrmalaryna sáıkes, ónimdi jumyspen qamtýdyń jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyna ózgerister men tolyqtyrýlar engizildi. Bul jóninde eńbek jáne halyqty áleýmettik qorǵaý mınıstrliginiń baspasóz qyzmetine silteme jasap QazAqparat habarlaıdy.

Az qamtylǵan kópbalaly otbasylardy, az qamtylǵan eńbekke qabiletti múgedektigi bar azamattar men jastardy jumysqa ornalastyrý, oqytý sapasyn arttyrý jáne kásipkerlikti damytý maqsatynda memlekettik qoldaýdyń birqatar jańa sharalary kózdelip otyr.

«Osylaısha, Jastar jyly aıasynda memlekettik baǵdarlama «Jastar - el tiregi» ulttyq jobasynyń keshendi is-sharalaryn iske asyrý» atty jańa baǵytpen tolyqtyryldy. Atalǵan Ulttyq joba «Jas maman» jáne «Jas kásipker» degen eki baǵyt boıynsha júzege asyrylatyn bolady. Atap aıtqanda, jańǵyrtylǵan 200 oqý ornynyń bazasynda ındýstrııalyq jáne servıstik 100 mamandyq boıynsha asa suranysqa ıe mamandar daıarlanatyn bolady. Úsh jyl ishinde 200 myńnan astam jastardy oqytyp shyǵarý josparlanýda» delingen habarlamada.

2021 jylǵa deıin jastar praktıkasymen qosymsha 30 myń adam qamtylyp, keminde 60 myń jas kásipkerlik negizderin oqıdy. Sondaı-aq, úsh jyl ishinde jańa bıznes-ıdeıalardy iske asyrý úshin jastarǵa, az qamtylǵan kópbalaly otbasylarǵa, az qamtylǵan eńbekke jaramdy múgedektigi bar azamattarǵa 505 myń teńgege deıingi mólsherde qaıtarymsyz 30 myń grant beriledi. «Bıznestiń jol kartasy-2020» memlekettik baǵdarlamasy aıasynda jas kásipkerlerge jalpy somasy 1,8 mlrd teńgeni quraıtyn taǵy 600 grant berilmek.

Budan basqa, jyl saıyn jastarǵa, kópbalaly analarǵa, múgedektigi bar azamattarǵa jeke isin ashý úshin 6,5 mln teńgege deıin jáne kooperatsııany damytýǵa 20 mln teńgege deıin 5 myń mıkrokredıt beriledi.