«Eńbek» memlekettik baǵdarlamasy ulttyq jobaǵa aýystyrylady - mınıstr

NUR-SULTAN. QazAqparat – Bıyl 1 shildede «Eńbek» memlekettik baǵdarlamasy ulttyq jobaǵa aýystyrylady. Bul týraly QR Eńbek jáne halyqty áleýmettik qorǵaý mınıstri Serik Shápkenov aıtyp berdi, dep habarlaıdy QazAqparat tilshisi.

«Memleket basshysynyń tapsyrmasymen, bıyl 1 shildeden bastap, «Eńbek» memlekettik baǵdarlamasy ulttyq jobaǵa aýystyrylady. Bul oraıda quraldar men mindetter jańa ádisnamaǵa sáıkes ózektendirilip qana qoımaı, oǵan múldem jańa tetikter men bıznes-protsester engiziledi. Atap aıtsaq, birinshi mindet boıynsha, jumysta otyryp oqyp, praktıkalyq daǵdylardy damytýǵa múmkindik jasalady. Elektrondy eńbek bırjasy bazasynda naryqta suranysqa ıe mamandyqtar boıynsha onlaın oqytýdyń jalpyulttyq platformasy iske qosylady», - dedi mınıstr Úkimettiń búgingi otyrysynda.

Ekinshi baǵyt aıasynda kásipkerlik bastamalardy qoldaý barynsha avtomattandyrylady. Aýyldyq jerlerde kásipkerlikpen aınalysýdy keńeıtý úshin óndirýshiler men satyp alýshylardy baılanystyrý sharalary qabyldanady.

Kelesi jyly kredıtteý jáne granttyq qoldaý úshin bıznes-jobalardy irikteý óńirlerdiń qajettiligine qaraı júzege asyrylady, sondaı-aq kásipkerler palatasynyń mamandarymen oqýdan bastap, kásipker bolǵansha súıemeldenetin bolady.

«Úshinshi mindet nysanaly toptardy ataýly túrde qoldaýǵa negizdeledi. Bul oraıda olardyń qajettilikterine qaraı jumyspen qamtýǵa járdemdesý boıynsha jekelegen jobalardy iske asyramyz. Jumyspen qamtý salasyndaǵy qyzmetterdi elektrondy formatqa aýystyrý boıynsha keshendi sharalar qabyldaımyz. Bul baǵytta eń aldymen eńbek naryǵynyń ınfraqurylymy damytylyp, mobıldi jáne tsıfrly jumyspen qamtý ortalyqtary ashylady. Sondaı-aq, jumyspen qamtý qyzmetteri onlaın jáne proaktıvti túrde, ıaǵnı ótinish berýsiz keńinen usynylady», - dep túsindirdi Eńbek mınıstri.

Spıkerdiń aıtýynsha, ulttyq joba aıasynda qabyldanyp jatqan sharalar bolashaqta halyqtyń ómir súrý sapasyn jaqsartýǵa jáne naqty aqshalaı tabystyń 27 paıyzǵa, eńbekaqynyń 304 myń teńgege deıin ósýine, jańa jumys oryndaryn qurýǵa jáne 2025 jylǵa qaraı jumyssyzdyq deńgeıin 4,7 paıyzǵa deıin tómendetýge yqpal etedi.

Buǵan deıin QR Premer-Mınıstri Asqar Mamın jumyspen qamtýdyń óńirlik kartalaryn ázirlep, turaqty jumys oryndaryn qurýǵa erekshe nazar aýdarý qajettigin aıtqan edi.

Eńbek jáne halyqty áleýmettik qorǵaý mınıstrligi bıyl 1 mln 200 myń adamdy jumyspen qamtý sharalary arqyly qoldaýdy josparlap otyr.