Enbek.kz portaly arqyly jumys tabý múmkindigi jetildirildi

NUR-SULTAN. QazAqparat - Enbek.kz portalynda jumys izdeýshilerge ózderin jumys berýshilerdiń aldynda kórsete bilýge, al kompanııalarǵa neǵurlym qolaıly qyzmetkerdi jyldam tabýǵa bolatyn qyzmet jetildirildi, dep habarlaıdy QazAqparat tilshisi.

Eńbek jáne halyqty áleýmettik qorǵaý mınıstrligine qarasty Eńbek resýrstaryn damytý ortalyǵynyń sarapshylary sáýir aıynyń basynda Enbek.kz elektrondyq eńbek bırjasynda jańa quraldarmen daǵdylar bankin tolyqtyrdy. Endi túıindeme toltyrý kezinde paıdalanýshylar óz bilimi men iskerligin dálirek sıpattaı alady. Bul rette qajetti parametrlerdi tańdaý ońtaılandyrylyp otyr. Atap aıtqanda júıe jumys izdeýshilerdiń kásipteri men mamandyqtaryna sáıkes keletin daǵdylardy, ıkemdilik pen biliktilikterdi ózi kórsetedi.

«Buryn Enbek.kz saıty arqyly jumysqa ornalasý kezinde jumys berýshi men qyzmetker arasynda jumys tájirıbesi, jalaqy mólsheri jáne atqaratyn laýazymyna sáıkestigi jóninde kelispeýshilikter jıi týyndaıtyn. Azamattardyń kóbi saıttaǵy daǵdylar banki qyzmetkerlerge qoıylatyn naqty talaptardy kórsetýge múmkindik bermeıtinine shaǵymdanatyn. Endi biz júıeni zamanǵa saı talapqa beıimdedik. Jumys berýshilermen ártúrli mamandyqtar úshin kásibı standarttardy ázirledik. Qazir biz olardy jańartylǵan daǵdylar bankine engizemiz. Ol kóp uzamaı paıdalanýshylardyń talaptaryna tolyǵymen sáıkes keletin bolady», - dedi ERDO mamandyqtar atlasyn súıemeldeý basqarmasynyń basshysy Olga Kıseleva.

Jańashyldyqtar qazaqstandyq jumys berýshiler qaýymdastyǵy daıyndaǵan 480 kásibı standarttyń negizinde engizildi. Enbek.kz saıtynda atalmysh júıe birinshi kezekte jumys berýshilerge barynsha qolaıly mamandardyń túıindemesin, al izdenýshilerge qolaıly mekemelerdi kórsetedi. Tańdaý kezinde basymdyq túıindemede jáne qajetti mamanǵa qoıylatyn talaptar tizimin toltyrý kezinde jazǵan kilt sózderdiń (ár mamannyń qandaı jeke daǵdylary bar) sáıkes kelýine negizdelmek. Osylaısha jumys izdeýshiler men jumys berýshiler qajetti nátıjege jyldam qol jetkizedi.

Jańartylǵan daǵdylar banki jaqynda testtik rejimde iske qosylady. Birneshe aı ishinde avtomatty toltyrý negizinde usynylatyn suraqtar túrinde eń qajetti daǵdylar anyqtalmaq. Bul túıindemeni toltyrýdy jáne izdenýshilerge qoıylatyn talaptardy jeńildetedi. Sondaı-aq, joba avtorlary paıdalanýshylardyń keri pikirin ala alady.

Eske sala ketsek Qazaqstandaǵy jumys izdeýshiler men bos jumys oryndary týraly enbek.kz portalyna osydan úsh jyl buryn ashylǵan edi. Enbek.kz portaly arqyly bos oryndar týraly aqparatty jetkizý úshin jumyspen qamtý zańnamasyna ózgerister engizý qarastyrylǵan. Ol qaǵazbastylyqty joıyp, bıznes jumysyn jeńildetýge múmkindik beredi.