«Eńbek-Qyzyljar» kásiporny dırektorynyń mindetin atqarýshy para alǵany úshin aıyppul tóleıdi

PETROPAVL. QazAqparat – Petropavl qalalyq soty para alyp ustalǵan «Eńbek-Qyzyljar» sharýashylyq júrgizý quqyǵyndaǵy respýblıkalyq memlekettik kásiporny dırektorynyń mindetin atqarýshyǵa qatysty qylmystyq isti qarap, úkim shyǵardy, dep habarlaıdy QazAqparat tilshisi.

Petropavl qalalyq sotynyń málimetinshe, «Eńbek-Qyzyljar» ShJQ RMK dırektorynyń mindetin atqarýshy A. memlekettik fýnktsııalardy oryndaýǵa ýákiletti tulǵa bola tura, Soltústik Qazaqstan oblysy qylmystyq atqarý júıesi departamentiniń túzeý mekemelerine tamaq ónimderin jetkizý boıynsha memlekettik satyp alý týraly shart boıynsha kórsetiletin qyzmet úshin bıýdjet qarajatyn kedergisiz aýdaramyn dep M. esimdi jeke kásipkerden 200 myń teńge para alǵan.

Qylmystyq isti sotqa deıingi tergep-tekserý jedel aıaqtalǵanyna baılanysty sot talqylaýy qysqartylǵan tártippen ótkizildi.

Prokýror sottalýshy A.-ny memlekettik qyzmette laýazymdy atqarý quqyǵynan ómir boıyna aıyra otyryp, 3 jylǵa bas bostandyǵynan aıyrý túrinde jaza taǵaıyndaýdy surady.

Sottalýshy kinásin moıyndap, aıyppul taǵaıyndaýdy surady.

Jalpy para alǵany úshin aıyppul nemese bas bostandyǵynan aıyrý túrinde jaza kózdelgen.

Sot A.-nyń kinásin tolyq moıyndaýyn, shyn nıetpen ókinýin, qylmystyq quqyq buzýshylyqty ashýǵa belsendi túrde yqpal etýin esepke alyp, qylmystyq jaýaptylyq pen jazany jeńildetetin mán-jaı retinde qarady.

Jazany aýyrlatatyn mán-jaı anyqtalǵan joq.

Sot A.-ny memlekettik qyzmette laýazymdardy atqarý quqyǵynan ómir boıyna aıyra otyryp, oǵan alǵan parasynyń otyz eselengen somasy mólsherinde aıyppul túrinde jaza taǵaıyndady, ıaǵnı sottalýshy endi 6 mln teńge aıyppul tólemek.