Eńbek kúshi tapshy óńirlerge kóshken 3,4 myńnan astam adam birjolǵy sýbsıdııa aldy
ASTANA. KAZINFORM — Qazaqstanda eńbek resýrstaryna suranys joǵary óńirlerge erikti túrde qonys aýdaratyn azamattardy qoldaý jalǵasyp jatyr. Bul týraly QR Eńbek jáne halyqty áleýmettik qorǵaý mınıstrligi málimdedi.
Mınıstrliktiń málimetinshe, 2026 jylǵy 1 shildedegi jaǵdaı boıynsha kóshýge beriletin memlekettik birjolǵy sýbsıdııany 3 420 adam alǵan. Al turǵyn úıdi jaldaý men kommýnaldyq qyzmetterge jumsalǵan shyǵyndardy óteý 3 432 azamatqa taǵaıyndalǵan.
— Bıyl kóshýge arnalǵan birjolǵy sýbsıdııa mólsheri — otbasynyń árbir múshesine 70 aılyq eseptik kórsetkishti (302 750 teńge). Budan bólek, baǵdarlamaǵa qatysýshylarǵa otbasy quramyna jáne qonys aýdaratyn eldi mekenge baılanysty turǵyn úıdi jaldaý men kommýnaldyq qyzmetter shyǵyndaryn óteýge 64 875 teńgeden 129 750 teńgege deıin ótemaqy tólenedi, — dep habarlady vedomstvo.
Mınıstrlik memlekettik qoldaý sharalary óńiraralyq eńbek utqyrlyǵy baǵdarlamasy aıasynda qoldanystaǵy zańnamaǵa sáıkes kórsetiletinin atap ótti. Sondaı-aq vedomstvo baǵdarlamaǵa qatysýshylardy memlekettik qoldaý sharalarymen qamtamasyz etý jumystary aldaǵy ýaqytta da jalǵasatynyn málimdedi.
Eske salaıyq, buǵan deıin kadr tapshy óńirlerge kóship barǵandarǵa baspana alýǵa 7 mln teńgege deıin beriletinin jazǵan edik.
