Eńbek kúnine oraı Astanada arnaıy forým ótedi
ASTANA. KAZINFORM – Qazaqstanda jyl saıyn qyrkúıektiń sońǵy jeksenbisinde Eńbek kúni meıramy atalyp ótedi. Bıyl osy merekege oraı QR Eńbek jáne halyqty áleýmettik qorǵaý mınıstrligi Astana qalasynyń ákimdigimen birlesip forým ótkizýdi josparlap otyr, dep habarlaıdy mınıstrliktiń baspasóz qyzmeti.
Eńbek kúni – eldiń damýyna úles qosyp júrgen ár mamannyń kásibı qyzmetin baǵalap, adal jumys pen sheberliktiń mańyzyn dáripteıtin kún.
-Byltyr Memleket basshysy jarııalaǵan «Jumysshy mamandyqtar jyly» bul baǵyttaǵy bastamalarǵa jańa serpin berdi. Osy kezeńde jastardyń kásibı baǵdaryn kúsheıtýge, qajetti daǵdylardy meńgerýine jaǵdaı jasaýǵa jáne bilikti mamandardyń eńbegin laıyqty baǵalaýǵa erekshe mán berildi,-delingen habarlamada.
Sondaı-aq onda bul baǵyttaǵy jumystardyń bıyl da jalǵasyp jatqany aıtylǵan. Eńbek kúnin atap ótý aıasyndaǵy negizgi sharalardyń biri forým bolmaq. Іs-shara barysynda respýblıkalyq «Eńbek joly» baıqaýynyń jeńimpazdary marapattalyp, jumysshy mamandyqtardyń ókilderine memlekettik nagradalar tabystalady.
«Eńbek joly» respýblıkalyq baıqaýy jyl saıyn ótkizilip keledi. Onyń maqsaty – eńbekti baǵalaý, jumysshy mamandyqtardyń bedelin arttyrý, aǵa býynnyń tájirıbesin keıingi urpaqqa jetkizý jáne óz isine adal azamattardy kópshilikke úlgi etý.
Baıqaý úsh nomınatsııa boıynsha ótkiziledi:
«Úzdik eńbek áýleti» – kásibı dástúrin birneshe urpaq boıy jalǵastyryp kele jatqan otbasylar arasynda ótetin baıqaý. Qatysýshy áýlet keminde úsh býynnan turyp, bir kásiporyndaǵy jalpy ótili 20 jyldan kem bolmaýǵa tıis.
«Jumysshy jastardyń úzdik tálimgeri» – kásibı bilimi men tájirıbesin jas mamandarǵa úıretip júrgen tájirıbeli qyzmetkerlerge arnalǵan. Baıqaýǵa qatysý úshin mamannyń eńbek ótili keminde 20 jyl bolýy qajet.
«Úzdik jas jumysshy» – óz isin jaqsy meńgergen, belsendiligimen jáne jaqsy nátıjesimen erekshelenip júrgen jas mamandar arasynda ótkiziledi. Qatysýshynyń eńbek ótili 5 jyldan aspaýy kerek.
Respýblıkalyq kezeńniń qorytyndysy boıynsha ár nomınatsııada úzdikter anyqtalady. Olardyń eńbek joly kásibı sheberliktiń, óz isine jaýapkershiliktiń jáne urpaqtar sabaqtastyǵynyń jarqyn úlgisi bolmaq.
«Eńbek joly» – kún saıynǵy mańdaı terimen eldiń búginin qalyptastyryp, bolashaǵyna úles qosyp júrgen adamdardyń tarıhy. Al forým osyndaı jandardy kópshilikke tanystyryp, olardyń ómiri men tájirıbesin jastarǵa úlgi etýge múmkindik beredi.
Osyǵan deıin Qazaqstannyń kóshi-qon júıesin eńbek naryǵynyń suranysyna beıimdep jatqany týraly jazdyq.
