Eńbek kúnin atap ótýdiń jańa tujyrymdamasy qajet - Álıhan Báımenov
«Meniń oıymsha eńbek kúnin atap ótýdiń jańa tujyrymdamasy qajet. «Eńbek eri» degen ataqty sol eńbek kúninde berýimiz kerek. Sol eńbek kúninde túrli salada jetistikke jetken adamdardyń ómir joly týraly ártúrli kezdesýler uıymdastyryp, habarlar jasap, jastardyń boıynda «eńbekpen jańa bıikke kóterilýge bolady» degen uǵym qalyptastyrýymyz qajet. Sondaı-aq, eńbek durys baǵalanýy tıis. Eńbek adamyn qorǵaıtyn kásipdaqtardyń rólin kóterýimiz kerek», - dedi ol.
Álıhan Báımenov Túrkistandaǵy quryltaıda turaqty damýǵa negiz bolatyn qundylyqtar kóterilgendigin sóz etti.
«Búgingi taqyryp álemdik úderisterge saı. Sebebi, qazirgi zamanda júrek qundylyqtary alǵa shyǵyp jatyr. Adam resýrstarynyń sapasyn densaýlyq, bilim, bilik anyqtaıdy. Al, sol adamı resýrstar adamı kapıtalǵa aınalýy úshin qundylyqtar mańyzdy. Búgingi quryltaıda jalpy turaqty damýǵa negiz bolatyn qundylyqtar men mádenı-rýhanı damýdyń aıasyndaǵy mańyzdy máseleler sóz boldy. Prezıdent osy máselelerge basa nazar aýdardy», - dedi ol.
