Eńbek quldyǵy: Qaraǵandy oblysyndaǵy barlyq fermalar tekseriledi
QARAǴANDY. QazAqparat - Qaraǵandy oblysynyń ákimi Erlan Qoshanov eńbek quldyǵy máseleleri boıynsha «jedel jeli» qurýdy tapsyrdy. Oǵan qurbandardyń ózderi, olardyń jaqyndary men týysqandary da júgine alady, dep habarlaıdy QazAqparat aımaq ákimdigine silteme jasap.
«Oblys turǵyny birneshe jyl boıy ony quldyqta ustaǵanyn málim etti. Oqıǵa jóninde barlyq BAQ jarııalady. Bul - masqara. HHІ ǵasyr, al bizdiń jerlesterimiz osyndaı jaǵdaılarǵa tap bolady. Al polıtsııaǵa habarlassa, nemquraılyqpen betpe-bet kezdesedi. Ol azdaı, polıtseıler fermerlerdiń osyndaı derekterin jasyrady deýge bolady», - dedi Erlan Qoshanov.
Ol Polıtsııa departamentinen jaǵdaıdy anyqtap, kinálilerdi jaýapkershilikke tartýdy talap etti.
Óńir basshysy barlyq fermerlik sharýashylyqtardy onda kimderdiń jumys isteıtinin jáne qandaı jaǵdaıda júrgenin tekserý qajettigin atap ótti. «Jaqyn arada «jedel jeli» ashylýy tıis. Onyń jumysyna ÚEU men áleýmettik qorǵaý qyzmetin tartý kerek», - dedi ol.
Oblys ákimi bul jumys shuǵyl jaǵdaılarda ǵana emes, turaqty túrde júrgizilýi tıistigin qadap aıtty. Bul máselege orynbasary Serik Shaıdarovty jaýapty etip belgiledi. Tapsyrmalardyń oryndalýy týraly alǵashqy esep qyrkúıek aıynyń sońynda daıyn bolýy tıis.
