Eńbek kitapshasynda qate ketse, eńbek ótilin qalaı rastaýǵa bolady
ASTANA. KAZINFORM – Eńbek kitapshasynda qate ketse, mór basylmasa nemese keıbir málimetter durys toltyrylmasa, eńbek ótilin arhıv anyqtamasy nemese sot arqyly rastaýǵa bolady.
Bul týraly Óńirlik kommýnıkatsııalar qyzmetinde ótken brıfıngte QR Eńbek jáne halyqty áleýmettik qorǵaý mınıstrligi Halyqty áleýmettik qorǵaý salasyndaǵy retteý jáne baqylaý komıtetiniń Astana qalasy boıynsha departamentiniń basshysy Asqar Aımaǵambetov aıtty.
Onyń aıtýynsha, 1998 jyldyń 1 qańtaryna deıingi eńbek ótili zeınetaqy taǵaıyndaý kezinde eńbek kitapshasy arqyly esepke alynady. Sondaı-aq bazalyq zeınetaqyny eseptegende mindetti zeınetaqy jarnalary aýdarylǵan kezeńder de eskeriledi.
– Eger eńbek kitapshasynda qate ketse, túzetý bolsa nemese qajetti jazbalar bolmasa, azamat eńbek ótilin basqa qujattarmen rastaýy kerek, – dedi Asqar Aımaǵambetov.
Spıkerdiń aıtýynsha, eńbek kitapshasyn toltyrý kezinde kadr qyzmetkerleri qatelesip ketýi múmkin. Mysaly, buıryqtyń nómiri nemese kúni jazylmaı qalady, uıymnyń móri qoıylmaıdy nemese mór anyq basylmaıdy.
Mundaı jaǵdaıda eńbek ótilin arhıvten alynǵan anyqtamamen rastaýǵa bolady. Al eger qujattaǵy qatelerdi basqa jolmen dáleldeý múmkin bolmasa, eńbek ótili sot arqyly anyqtalady.
Sondaı-aq Qazaqstanda qaǵaz eńbek kitapshalarynan birtindep bas tartyp, eńbek qyzmetiniń esebin tolyqtaı tsıfrlyq formatqa kóshirý josparlanyp otyr.
Buǵan deıin Astanada zeınetaqy men járdemaqyny rásimdeý jeńildegeni jóninde jazdyq.
