Eńbek kitapshasy kerek pe – mınıstr jaýaby

Qujaty tsıfrlyq nusqaǵa kóshirilmegen qazaqstandyqtardan zeınetke shyǵar kezde eńbek kitapshasy talap etiledi, dep habarlaıdy Kazinform. 

«Eger azamattyń 1998 jyldyń 1 qańtaryna deıin jumys ótili bolsa jáne ol jumys isteıtin jerde kadr qyzmeti áli tsıfrlyq nusqaǵa kóshirilmese, onda eńbek kitapshasy qajet bolady. Al jumys kezinde kadr bólimi onyń eńbek kitapshasyn sandyq nusqaǵa aýystyrsa jáne ony rastasa, eńbek kitapshasyn usynýdyń qajeti joq», - dedi Eńbek jáne halyqty áleýmettik qorǵaý mınıstri Svetlana Jaqypova Úkimet otyrysynan keıingi baspasóz máslıhatynda. 

Ol sondaı-aq eńbek sharttary men eńbek kitapshasyn tsıfrlandyrýdy kózdeıtin elektrondyq eńbek bırjasy elimizde 2015 jyldan bastap qolǵa alynǵanyn aıtty. Degenmen búgingi tańda zańda jumys berýshini eńbek kitapshasyn tsıfrlyq nusqaǵa kóshirýge mindetteıtin norma joq. 

«Biz árıne, qazaqstandyqtardyń quqyǵyn qorǵaý turǵysynan bul normany qatańdatqymyz keledi. Óıtkeni bizde kóptegen elektrondyq eńbek sharty jasalmaıdy. Eger Eńbek kodeksinde elektrondyq eńbek sharty mindetti degen norma paıda bolsa, onda bizde «konverttegi jalaqy» (eńbek shartyn jasamaı, qolma-qol jalaqy alý – avtor túsindirmesi) bolmas edi», - dedi Svetlana Jaqypova.