Eńbek kóshi-qonynyń zańdyq negizi myǵym bolýy shart - Májilis spıkeri
ASTANA. 27aqpan. QazAqparat - Eńbek kóshi-qony úrdisteri tek qana suranystar men usynystar arqyly rettelmeıdi, onyń zańdyq negizi myǵym bolýy shart.
Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasyn talqylaý barysynda palata spıkeri Nurlan Nyǵmatýlın osylaı málim etti.
Májilis tóraǵasy Nurlan Nyǵmatýlın qaralyp otyrǵan zań jobasynyń mańyzdylyǵyna toqtala kelip, qujatty ekinshi oqylymda muqııat qaraý qajettigin aıtty. «Óıtkeni, bizdiń elde eńbek kóshi-qony úrdisteri tek qana suranystar men usynystar arqyly rettelmeıdi. Bul úshin eń aldymen, naqty zańdyq negizi bolýǵa tıis. Bunyń bári eńbek mıgratsııasy zańnamalyq deńgeıde rettelmegen keıbir elderde oryn alyp otyrǵan túrli saldardan saqtanýǵa septigin tıgizedi. Ondaı elderde eńbek mıgratsııasynyń saldary áleýmettik qana emes, saıası sıpat alyp ketkeni de baıqalǵan»,-dedi Májilis tóraǵasy.
Bul rette spıker zańnyń naqty áreketterge múmkindik berýi tıistigin alǵa tartty. Esterińizge sala keteıik, jıyn barysynda aıtylǵandaı, bul zań jobasynyń negizgi maqsaty - eńbekshi kóship-qonýshylardy zańdastyrý, sondaı-aq, jeke tulǵalardyń sheteldik jumys kúshin tartýyna arnalǵan ruqsattar berý tártibin jeńildetý bóliginde kóshi-qon úrdisterin memlekettik retteýdi jetildirý bolyp tabylady.
Sonymen qatar, eńbekshi kóship qonýshylardyń jeke sanattaryn tartýdy retteıtin eńbek zańynyń, sondaı-aq salyq zańynyń kóship kelýshilerdiń salyq agenti bolyp tabylmaıtyn jeke tulǵalarda jumys istegeni úshin alǵan tabystarynan jeke tabys salyǵyn tóleý bóligindegi oryn alǵan olqylyqtardy joıý josparlanyp otyr.
