Eńbek kóshi-qonyna talapty kúsheıtip, etnıkalyq kóshi-qondy jeńildetýge tıispiz - M. Baqtııaruly
ASTANA. QazAqparat - Eńbek kóshi-qonyna talapty kúsheıtip, etnıkalyq kóshi-qondy jeńildetýge tıispiz. Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Murat Baqtııaruly málimdedi.
«Sońǵy jyldary elge oralyp jatqan oralmandardyń azamattyq alýdaǵy jáne elimizde turaqty turýdaǵy quqyqtyq, ákimshilik kedergileri kóbeıip ketti. Atap aıtqanda, mundaı kedergiler el Úkimetiniń 2012 jylǵy №362 qaýlysymen, 2014 jyldyń №111 qaýlysynyń negizinde júzege asyp keledi. Bul olardyń atamekenine qonystanýyn qıyndatyp otyr. Bul rette qandastarymyzdan onyń azamattyǵy, memlekettiń jazbasha kelisimi retinde bolýy múmkin ketý paraǵy, shetelge turaqty turý úshin ruqsatty rastaıtyn basqa qujattar men kelgen elinde sottylyǵynyń bar, ne joqtyǵyn rastaıtyn qujattar talap etile bastaǵan. Al kelgen elinen ákelingen qujattarǵa sol eldiń osyndaǵy dıplomatııalyq ókilderi mór basyp, maquldaıtyny taǵy bar», - deıdi Murat Baqtııaruly.
Onyń sózine qaraǵanda, ondaı eki túrli qujatty ákelý qarapaıym oralmandar úshin quqyqtyq turǵydan múmkin bolǵanymen, is júzinde múldem qıyn.
«Árıne, Úkimettiń atalǵan qaýlylary elimizge syrttan keletin kelimsekterdiń kóshi-qony aǵynynan týyndaıtyn qaýip-qaterdiń aldyn alý maqsatynda qabyldanǵanyn túsinýge bolatyndaı. Biraq, budan buryn mundaı talaptar etnıkalyq qazaqtarǵa qatysy joq edi, buǵan deıingi Úkimet qaýlylarynyń basym bóliginde másele sheteldegi qazaqtarǵa qatysty bolǵan jaǵdaıda etnıkalyq qazaq ókilderinen ózge degen tirkes arnaıy qosylatyn. Ókinishke qaraı, sońǵy birneshe jyldyń kóleminde sheteldegi qazaqtar múddesi kóbinese umyt qalyp, olardyń quqyqtyq dárejesi ózge sheteldikterdiń dárejesine deıin quldyrap ketti», - deıdi Murat Baqtııaruly.
Osyǵan oraı, senator sheteldegi qandastarymyzdyń Qazaqstanǵa kelip turaqty turýyna kedergi bolmasy úshin, Úkimet qaýlysyna «etnıkalyq qazaqtardan ózge» degen bir aýyz sóz tirkesin qosýdy suraıdy. «Kóptegen elderde eńbek kóshi-qony men etnıkalyq kóshi-qonǵa eki túrli kózqaras bolatynyn aıtady. Máselen, biraz elde eńbek kóshi-qonynyń talaby barynsha qataıǵan bolsa, kerisinshe etnıkalyq kóshi-qonǵa barynsha jeńildikter jasalady. Bizge de keregi osy», - deıdi senator.
