Eńbek kóshi-qony máseleleri jónindegi zańnama jetildiriledi
ASTANA. 8 qazan. QazAqparat - Búgin Qazaqstan Respýblıkasy Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetinde «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Zań jobasy eńbekshi kóship kelýshilerdi zańdastyrýǵa jáne kóshi-qon úderisterin memlekettik retteýdi jetildirýge baǵyttalǵan. Zań jobasymen birqatar zańnamalyq aktilerge ózgerister men tolyqtyrýlar engizý kózdelip otyr. Zań jobasynda «Salyq jáne bıýdjetke tólenetin basqa da mindetti tólemder týraly» kodekske eńbekshi kóship kelýshiler jeke tabys salyǵyn aılyq eseptik kórsetkishtiń 2 eselengen mólsherinde tólem jasaý týraly ózgeris engizý týraly ereje bar. Sondaı-aq, egerde, eńbekshi kóship-qonýshy jeke tabys salyǵynyń somasy jeke tabys salyǵy somasynyń aldyn ala tóleminen asyp ketken jaǵdaıda salyq komıtetine jeke tabys salyǵy boıynsha deklaratsııa tapsyrýy qarastyrylǵan. Sonymen qatar, ýákiletti organ eńbekshi kóship-qonýshy retinde bekitken merzim men sıpaty boıynsha ruqsat berilgen salyq tóleýshiniń turaǵy týraly málimetterdi salyq qyzmetteri organdaryna berýge ishki ister organdary mindettelip otyr. Odan basqa, Eńbek kodeksine: ishki ister organdary beretin ruqsat alǵanǵa deıin eńbekshi kóship-qonýshylarmen eńbek shartyn jasaýdy doǵarý; - eńbekshi kóship-qonýshymen eńbek shartyn jasaý merzimi oǵan ruqsat etilgen ýaqyttan aspaýy tıis ekendigi týraly ózgerister men tolyqtyrýlar engiziletin bolady. Sondaı-aq «Halyqtyń kóshi-qony týraly» zań da ózgeriske ushyrady, onda joıylǵan erejeler: kóship-qonýshy oralmandar kvotasy (bul rette Úkimet oralmandardy qonystandyrý úshin aımaqtardy belgileıdi); oralmandarǵa qonystandyrylǵan aımaqqa baılanysty teńdestirilgen biryńǵaı járdemaqy tóleý; oralmandarǵa turǵyn úı satyp alý úshin qarjy bólý; - eńbekshi kóship-qonýshylardyń kelýi jáne bolý jaǵdaıy jáne eńbekshi kóship-qonýshyǵa ruqsat berý tártibi qosymsha erejelermen tolyqtyrylatyn bolady. Sonymen birge ishki ister organdary eńbekshi kóship-qonýshyǵa: - Qazaqstan Respýblıkasynyń aýmaǵynda onyń bolýy zańdy ekenin aıǵaqtaıtyn qujattaryn kórsetkende; - ruqsat alýǵa jazylǵan ótinishte kórsetilgen merzimge jeke tabys salyǵyn aldyn ala tólem jasaǵanda sol ótinishte kórsetilgen (bir, eki nemese úsh aıǵa, biraq on eki aıdan kóp emes) merzimge beriledi. Zań jobasy birinshi oqylymda qaraýǵa Palataǵa jiberildi.
