Eńbek kodeksine onlaın jumys isteıtinderdiń qyzmetin retteıtin bap engizilmek

ASTANA. QazAqparat – QR Eńbek kodeksine onlaın jumys isteıtin qyzmetkerlerdiń eńbek qatynasyn retteıtin jańa bap engiziledi. Bul týraly Májilistiń qaraýyna engizilgen «QR keıbir zańnamalyq aktilerine áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasynda jazylǵan, dep habarlaıdy QazAqparat tilshisi.

«Qoldanystaǵy zańnama sheńberinde eńbek qyzmetin mobıldik qosymshalar arqyly júzege asyratyn qyzmetkerlerdiń eńbek rejımderine, uzaqtyǵyna jáne eńbekaqy tóleýge, onyń ishinde eńbek fýnktsııalaryn oryndaý úshin jabdyqtarmen jáne quraldarmen qamtamasyz etýge qatysty eńbegin retteý qıyndatylǵan. Osyǵan baılanysty, jumyspen qamtýdyń osy túriniń erekshelikterin eskere otyryp, eńbek qyzmetin ınternet-platformalar negizinde júzege asyratyn qyzmetkerlerdiń qyzmetin retteý jóninde jeke bap engizý qajet», - dep jazylǵan qujatta.

Tıisinshe, ınternet-platforma nemese mobıldik qosymshany paıdalana otyryp qyzmet etetin jumyskerlerdiń eńbek qatynastary QR Eńbek kodeksiniń jańa 146-1 babymen retteledi.

«Internet-platformalardy nemese platformalyq jumyspen qamtýdyń mobıldik qosymshasyn qoldana otyryp, qyzmetin júzege asyratyn jumysker men zańdy tulǵa arasyndaǵy eńbek sharty osy Kodekstiń 30-baby 1-tarmaǵynyń 2 tarmaqshasynda kózdelgen shekteýsiz belgili bir merzimge jasalady. Sonymen qatar atalǵan bapqa sáıkes, ınternet-platformalardy paıdalana otyryp, jumys isteıtin qyzmetkerler úshin kúndelikti jumystyń (jumys aýysymynyń) ózgeshe uzaqtyǵy belgilenýi múmkin», - delingen jańa bapta.

Qosa ketsek, buǵan deıin 4 kúndik jumys aptasymen qyzmet etetinderge ústeme jumys úshin qosymsha aqy tólenbeıtinin jazyp edik.