Eńbek kodeksi eńbek qatynastaryna qatysty máselelerdi tolyq sheshe alǵan joq - G.Ábdihalyqova
ASTANA. 7 maýsym. QazAqparat /Aıdar Ospanalıev/ - Halyqaralyq eńbek uıymynyń baǵalaýynsha, Qazaqstanda eńbek qatynastarynyń ońtaıly júıesi qalyptasqan. Atalmysh júıe jumys berýshiler men eńbekkerler arasyndaǵy áleýmettik áriptestikti damytýǵa yqpal etip otyr.
Sondaı-aq atalmysh qujat jumysshylardyń zańdy múddeleri men quqyqtaryn qorǵaý isinde aıtarlyqtaı áleýetke ıe ekendigin kórsetti. Soǵan qaramastan 2007 jyldan beri qoldanylyp kele jatqan Eńbek kodeksi eńbek qatynastaryna qatysty máselelerdiń barlyǵyn sheship tastady deýge bolmaıdy. Bul týraly búgin Eńbek jáne halyqty áleýmettik qorǵaý mınıstri Gúlshara Ábdihalyqova Astanada «Eńbek zańnamasyn jetildirý» atty taqyrypta ótken dóńgelek ústel otyrysynda málim etti.
Onyń sózine qaraǵanda, sońǵy 4 jyl ishinde Kodekstiń jekelegen normalarynda quqyq qoldaný sharalaryna qatysty birqatar jetildirýdi qajet etetin máselelerdiń bar ekendigi málim boldy. Bul másele ásirese eńbekkerlerdi jumysqa alý men olardy jumystan bosatýǵa qatysty bolyp otyr. «Qazaqstannyń 2020 jylǵa deıingi quqyqtyq saıasat tujyrymdamasynda halyqaralyq tájirıbe negizinde eńbek zańnamasyn jetildirý qajettigi aıtylǵan. Buǵan qosa eńbek zańnamasyn jetildirý - Qazaqstannyń Búkilálemdik bank reıtıngindegi eńbekkerlerdiń quqyqtaryn qorǵaý men eńbek naryǵynyń tıimdiligine baılanysty kórsetkishterdi joǵarylatý maqsatynda qajet bolyp otyr», - dedi mınıstr.
Onyń sózinshe, atalǵan maqsat-mindetterdi júzege asyrý úshin Eńbek kodeksine engizilgen túzetýlerge ózgerister engizýge qatysty zań jobasy daıyndalyp, qazirgi tańda bul qujat Parlament Májilisiniń qaraýyna engizildi. «Bul qujatqa engizilgen ózgeristerdiń barlyǵyn biz osy ýaqytqa deıin jan-jaqty talqyladyq. Zań jobasynyń maqsaty - eńbek qatynastaryn quqyqtyq retteý sharalarynyń sapasyn arttyrý, osyǵan deıingi qujatta ketken kemshilikterdi joıý jáne eńbek zańnamalaryn halyqaralyq eńbek standarttaryna sáıkestendirý bolyp tabylady. Al jumysshylardy jumysqa qabyldaý men olardy jumystan bosatý baǵytynda zań jobasynda azamattardyń eńbek quqyqtaryn buzýdy eskertetin normalardy qatańdatyp, qoldanys barysynda bir-birine qaıshy keletin normalardy alyp tastaý sııaqty máseleler qarastyrylǵan», - dedi G.Ábihalyqova.
