Eńbek qaýipsizdigin saqtamaǵan jumys berýshilerge 428 mln teńgeden astam aıyppul salyndy
ASTANA. KAZINFORM – Eń kóp zań buzýshylyq eńbek qatynasy salasyna tıesili, atap aıtqanda jalaqynyń ýaqytynda berilmeýi, ıaǵnı keshiktirilýi.
- Bıyl 10 aıdyń ishinde memlekettik eńbek ınspektorlary 5 306 tekserý júrgizip, 6 571 eńbek zańnamasyn buzý faktisin anyqtady, qazir olardyń 80%-y joıyldy. Eń kóp zań buzýshylyq eńbek qatynasy salasyna tıesili. Atap aıtqanda, eńbekaqynyń ýaqytyly jáne tolyq kólemde tólenbeýi, eńbek shartyn jasamaý nemese shart tártibiniń saqtalmaýy. Sondaı-aq qyzmetkerlerdiń demalys alý jáne jumystan bosatý kezindegi kepildikteriniń buzylýy jıi kezdesedi, - dedi Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıtetiniń tóraǵasy Meırambek Ahmetov ortalyq kommýnıkatsııalar qyzmeti alańynda ótken baspasóz máslıhatynda.
Odan bólek, eńbek ınspektsııasy komıteti basshysynyń málimdeýinshe, jyl basynan beri eńbek qaýipsizdigi jáne eńbekti qorǵaý máseleleri boıynsha 1,1 myń quqyq buzýshylyq anyqtalǵan.
- Negizgi máseleler – arnaıy kıim men jeke qorǵanys quraldarynyń bolmaýy, tehnıka qaýipsizdigi talaptary men nusqaýlyqtardyń saqtalmaýy, sondaı-aq óndiristegi jazataıym oqıǵalardy ýaqytyly tergemeý nemese olardy jasyrý. 10 aıdyń qorytyndysy boıynsha jumys berýshilerge 3 369 nusqama berilip, 428 mln teńgeden astam somaǵa ákimshilik aıyppul salyndy, - deıdi mınıstrlik ókili.
Eske sala keteıik, ótken jyldan bastap memlekettik eńbek ınspektsııasy komıtetiniń qyzmetin qadaǵalaý jergilikti atqarýshy organdardan Eńbek jáne halyqty áleýmettik qorǵaý mınıstrliginiń qaramaǵyna berildi.