Eńbek qaýipsizdigin buzǵany úshin ákimshilik jaýapkershilik kúsheıtiledi

ASTANA. KAZINFORM — Eńbek jáne halyqty áleýmettik qorǵaý mınıstri Svetlana Jaqypova jumyskerler quqyqtaryn qorǵaýdy kúsheıtý úshin qandaı sharalar kózdelgenin aıtyp berdi.

— Eńbek qaýipsizdigi jáne eńbekti qorǵaý salasyndaǵy tsıfrlyq monıtorıng arqyly óndiristik jaraqattanýdyń aldyn alý tetikteri jetildiriledi, kásiporyndarǵa syn-qater klasyn berip, kásiptik táýekelderdi ıntegraldy baǵalaý engiziledi. Sondaı-aq oqytýǵa jáne bilimdi tekserýge qoıylatyn talaptardy, eńbek qaýipsizdigi men eńbekti qorǵaýdy buzǵany úshin ákimshilik jaýapkershilik kúsheıtiledi, — dedi S. Jaqypova Úkimet otyrysyndaǵy baıandamasynda.

Eńbek qatynastarynyń ashyqtyǵy men zańdylyǵyn qamtamasyz etý úshin jumys berýshilerdiń shtat kestesin ornalastyrýyn, eńbek jáne ujymdyq sharttar jasasý rásimderin elektrondyq formatqa aýystyrýdy kózdeıtin eńbek qatynastaryn deklaratsııalaý tetikterin engizý josparlanǵan.

— Ótken jyly biz halyqaralyq standarttardy eskerip, eń tómengi jalaqy mólsherin belgileý ádistemesin bekittik. Bıyl Halyqaralyq eńbek uıymynyń «Damýshy elderdi erekshe eskerip, eń tómengi jalaqyny belgileý týraly» № 131 konventsııasyn ratıfıkatsııalaýdy josparlap otyrmyz, — dedi Eńbek mınıstri.

Buǵan deıin S. Jaqypova Qazaqstanda jumysshy mamandarǵa qajettilik tek qana arta beretinin aıtqan edi. 

Sondaı-aq, bıyl jumys berýshilerdiń suranysymen 12 myń adam kásiptik oqytýdan ótedi.