Eńbek qaýipsizdigi: jyl basynan beri 59 jumysshy qaıtys boldy
ASTANA. KAZINFORM – Byltyr elimizde 45 jumysshy jazataıym kóz jumǵan. Bıyl mamyrda onyń sany 59-ǵa jetken. Bul týraly Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etti.
«Bıyl 1 mamyrdaǵy málimet boıynsha el aýmaǵynda 59 adam qaıtys boldy. Byltyr bul kórsetkish 45 bolatyn. Búgingi aıtylyp otyrǵan eńbek qaýipsizdigi tujyrymdamasy óz nátıjesin beredi dep oılaımyn», - dedi Tólegen Ospanqulov elordada ótken «Eńbekti qorǵaý jáne ónerkásiptik qaýipsizdik» atty halyqaralyq konferentsııa barysynda BAQ ókilderiniń saýalyna jaýap bere otyryp.
Odan bólek, komıtet tóraǵasy jumysshylardyń ómirin saqtandyrý máselesin qozǵady.
«Búginde mekemelerdiń 62%-y jumysshylardyń ómirin saqtandyrǵan. Qazir elimizde 7 saqtandyrý kompanııasy bar, biz olardyń jumysyna monıtorıng júrgizip otyrmyz. Mınıstrlik 2024-2030 jyldarǵa arnalǵan eńbek naryǵy tujyrymdamasyn ázirledi, sonyń ishindegi jańashyldyqtardyń biri – mindetti saqtandyrý», - deıdi ol.
Aıta keteıik, QR Kásipodaqtar federatsııasynyń málimeti boıynsha, ólim qurylys salasynda jıi kezdesedi.
Buǵan deıin komıtet basshysy Maıqaıyńdaǵy apatqa qatysty tekserý barysymen bólisken edi.
Sondaı-aq, Eńbek jáne halyqty áleýmettik qorǵaý mınıstri Svetlana Jaqypova qazaqstandyqtar jaıly ári laıyqty ómir súrýi qansha tabys tabýy kerektigi týraly pikir bildirdi.
