Eńbek qaýipsizdigi salasyndaǵy oqytý júıesine ózgerister engizilmek
ASTANA. KAZINFORM — QR Eńbek jáne halyqty áleýmettik qorǵaý mınıstrligi Eńbek qaýipsizdigi men eńbekti qorǵaý máseleleri boıynsha qyzmetkerlerdi, basshylardy jáne eńbek qaýipsizdigi men eńbekti qorǵaýdy qamtamasyz etýge jaýapty tulǵalardy oqytý, nusqaýlyq ótkizý jáne olardyń bilimin tekserý qaǵıdalary men merzimderine ózgerister engizbek. Tıisti vedomstvo basshysynyń buıryǵynyń jobasy «Ashyq NQA» portalynda jarııalandy.
— Jańashyldyqtar eńbek qaýipsizdigin jetildirýge, oqytatyn uıymdarǵa qoıylatyn talaptardy naqtylaýǵa, nusqaýlyq ótkizý men bilimdi tekserý tártibin retteýge, oqý nátıjelerin resimdeýdiń biryńǵaı tásilderin aıqyndaýǵa, sondaı-aq biliktilikti rastaýdyń ashyqtyǵy men qolaılylyǵyn qamtamasyz etetin elektrondyq sertıfıkattardy engizýge baǵyttalǵan, — delingen habarlamada.
Jobada kórsetilgendeı, ózgerister Qazaqstan Respýblıkasy Densaýlyq saqtaý jáne áleýmettik damý mınıstriniń 2015 jylǵy 25 jeltoqsandaǵy № 1019 «Qyzmetkerlerdiń, basshylardyń jáne eńbek qaýipsizdigi men eńbekti qorǵaýdy qamtamasyz etýge jaýapty adamdardyń eńbek qaýipsizdigi jáne eńbekti qorǵaý máseleleri boıynsha oqytýdy, nusqaýlyq ótkizýdi jáne bilimin tekserýdi júrgizý qaǵıdalary men merzimderin bekitý týraly» buıryǵyna engiziledi.
Buıryq jobasy 2025 jylǵy 11 jeltoqsanyna deıin «Ashyq NQA» ınternet-portalynda qoǵamdyq talqylaý úshin ornalastyryldy.
Aıta keteıik, óndiristegi jazataıym oqıǵalardy tergeý protsesi tolyq avtomattandyryldy.