Eńbek qaýipsizdigi mamandaryn daıarlaıtyn oqý ortalyǵy ashylady

ASTANA. KAZINFORM – Elimizde Halyqaralyq eńbek uıymynyń jobalyq keńsesi jumysyn bastady. Bul týraly QR Eńbek jáne halyqty áleýmettik qorǵaý mınıstri Svetlana Jaqypova aıtty.

— Qazaqstanǵa byltyr alǵash ret Halyqaralyq Eńbek Uıymynyń (HEU) Bas dırektory resmı saparmen keldi. Sonyń nátıjesinde Qazaqstanda bıyl jobalyq keńse (Halyqaralyq eńbek uıymynyń ofısi – red.) ashylyp, jumysyn bastady, - dedi ol Úkimet otyrysynda. 

Sondaı-aq vedomstvo basshysy eńbek qaýipsizdigi mamandaryn óz elimizde daıarlaıtyn oqý ortalyǵy ashylatynyn aıtty. 

- Eńbek resýrstaryn damytý ortalyǵy bazasynda Halyqaralyq eńbek uıymynyń Týrındik oqý ortalyǵynyń fılıalyn ashý baǵytynda belsendi jumys júrgizip jatyrmyz, - dedi Svetlana Jaqypova. 

Mınıstrdiń aıtýynsha, bul ortalyq mynandaı:

- shetelge shyǵýdy qajet etpesten eńbek qaýipsizdigi mamandaryn júıeli jáne sapaly daıyndaýdy uıymdastyrý;

- halyqaralyq ozyq tájirıbeni eskere otyryp ulttyq kadrlardyń biliktiligin arttyrý;

- áleýmettik áriptester, memlekettik organdar jáne halyqaralyq uıymdar arasyndaǵy ınstıtýtsıonaldyq baılanystardy nyǵaıtý;

- Ortalyq Azııada eńbek qorǵaý salasyndaǵy aımaqtyq quzyret ortalyǵy retinde Qazaqstannyń rólin kúsheıtý syndy múmkindikterge jol ashady.

Aıta keteıik, Qazaqstanǵa eńbek mıgranttary eń kóp keletin 4 el belgili boldy.