Eńbek qaýipsizdigin saqtamaǵan 207 laýazymdy adam qyzmetinen bosatyldy
«2020 jyly memlekettik eńbek ınspektorlary 4 439 tekserý júrgizdi. Olardyń barysynda 7 260 buzýshylyq anyqtaldy. Onyń ishinde eńbek qatynastary salasynda – 5 001, eńbek qaýipsizdigi jáne eńbekti qorǵaý boıynsha – 2 096, halyqty jumyspen qamtý boıynsha – 163. Eńbekti qorǵaýǵa baılanysty zańnamanyń negizgi buzýshylyqtary jumyskerlerdi qaýipsiz eńbek jaǵdaılarymen qamtamasyz etpeýden, qaýipsiz eńbek tásilderine úıretpeýden, jeke jáne ujymdyq qorǵaný quraldarymen, arnaıy kıimmen jáne arnaıy aıaqkıimmen qamtamasyz etpeýden, eńbekti qorǵaý jónindegi qyzmettiń nemese jaýapty adamnyń bolmaýynan kórindi», - dedi Tólegen Ospanqulov Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, tekserýlerdiń qorytyndysynda jumys berýshilerge 2 614 uıǵarym berilip, 182,2 mln teńge somasyna 1 090 aıyppul salyndy.
QR Bas memlekettik eńbek ınspektory sondaı-aq jumys oryndaryndaǵy eńbek jaǵdaılarynyń naqty kúıin jalpy baǵalaý jáne attestattaý nátıjeleri boıynsha eńbekti qorǵaý jónindegi is-sharalar keshenin qoldaný maqsatynda 2020 jyly 3 397 óndiristik nysan attestattaýdan ótkenin aıtty.
«Anyqtalǵan buzýshylyqtardy joıǵanǵa deıin memlekettik eńbek ınspektorlary 207 laýazymdy adamdy atqaryp otyrǵan qyzmetterinen bosatty. Memlekettik eńbek ınspektorlary eńbekti qorǵaý talaptaryn buzý faktileri boıynsha quqyq qorǵaý organdaryna 1 234 materıal jiberdi, olar boıynsha 173 qylmystyq is qozǵaldy», - dedi ol.