Eńbek qaýipsizdigi talaptaryna sáıkestikti baqylaýǵa arnalǵan onlaın-platforma ázirlenedi

NUR-SULTAN. QazAqparat – Óńir ákimdikteri qaýipsiz eńbek jaǵdaılaryn qamtamasyz etý boıynsha Jol kartalaryn bekitýi tıis. Mundaı tapsyrmany búgin Úkimet otyrysynda QR Premer-Mınıstri Asqar Mamın berdi, dep habarlaıdy QazAqparat tilshisi.

«Qaýipsiz eńbek jaǵdaılaryn qamtamasyz etý sharalaryn kúsheıtý úshin birinshiden, Eńbek mınıstrligine múddeli memlekettik organdarmen jáne áleýmettik áriptestermen birlesip, osy jylǵy 1 jeltoqsanǵa deıin jumys berýshiler úshin eńbek qaýipsizdigi talaptaryna sáıkestigi boıynsha ózin-ózi baqylaýǵa arnalǵan onlaın-platforma ázirleýdi jáne jumys berýshilerdi eńbek jaǵdaılaryn jaqsartýǵa ekonomıkalyq yntalandyrýdy arttyrý boıynsha zańnamany jetildirý jóninde Úkimettiń qaraýyna usynystar engizýdi tapsyramyn», - dedi Asqar Mamın.

Úkimet basshysy ekinshiden, Tótenshe jaǵdaılar mınıstrligine múddeli memlekettik organdarmen birlesip, osy jylǵy 1 qazanǵa qaýipti óndiristik obektilerde avarııalyqty azaıtý boıynsha jol kartasyn bekitýdi tapsyrdy.

«Úshinshi. Óńirlerdiń ákimdikteri ónerkásip oryndarymen birlesip, osy jylǵy 1 qyrkúıekke deıin qaýipsiz eńbek jaǵdaılaryn qamtamasyz etý boıynsha Jol kartalaryn bekitsin. Sonymen qatar, kásiporyndarmen óndiristegi jazataıym oqıǵalardan saqtandyrý sharttaryn jasaý boıynsha jumys júrgizsin», - dedi Premer-Mınıstr.