Eńbek qaýipsizdigi erejelerin buzǵany úshin 5 laýazymdy adam qyzmetten ketti
«Memlekettik eńbek ınspektorlary 2020 jyldyń 4 aıynda eńbek qaýipsizdigi jáne eńbekti qorǵaý salasynda 1299 tekserý júrgizdi, olardyń barysynda 529 ereje buzýshylyq anyqtaldy. Jumys berýshilerge eńbek qaýipsizdigi jáne eńbekti qorǵaý salasyndaǵy kemshilikterdi joıý týraly 51 nusqama shyǵarylyp, 3,2 mln teńge kóleminde 36 ákimshilik aıyppul salyndy», - delingen Eńbek jáne halyqty áleýmettik qorǵaý mınıstrligi málimetinde.
Eńbek qaýipsizdigi jáne eńbekti qorǵaý máseleleri boıynsha zańdy jáne jeke tulǵalardyń 230 ótinishi qaraldy, óndiristegi jazataıym oqıǵalarǵa 342 arnaıy tergeý júrgizildi.
«Jumysshylardyń ómiri men densaýlyǵyna tóngen naqty qaýipke baılanysty memlekettik eńbek ınspektorlarynyń talaby boıynsha jumys berýshiler eńbek qaýipsizdigi jáne eńbekti qorǵaý erejelerin buzǵany úshin kináli 5 laýazymdy adamdy qyzmetten bosatty. 1 uıymnyń qyzmetine tyıym salyndy. 263 is quqyq qorǵaý organdaryna joldandy, olar boıynsha 27 qylmystyq is qozǵaldy. Memlekettik organdar men jumys berýshilerdiń eńbekti qorǵaý salasyndaǵy qabyldaǵan keshendi sharalary óndiristik jaraqattanýdy azaıtýdyń oń úrdisin saqtaýǵa múmkindik berdi», - dep atalyp ótken vedomstvo habarlamasynda.
Budan buryn habarlanǵandaı, 2020 jylǵy qańtar-sáýir aılary aralyǵynda respýblıkanyń kásiporyndarynda 365 jazataıym oqıǵa tirkeldi. Onyń saldarynda 413 adam jaraqat aldy.