Eńbek qatynastary salasyndaǵy zańnamaǵa ózgeris engizilip jatyr

ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine eńbek zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. 

Májilistiń Áleýmettik-mádenı damý komıtetiniń málimetine qaraǵanda, zań jobasy Parlament depýtattarynyń bastamashylyǵymen ázirlendi. Qujat Qazaqstan Respýblıkasynyń eńbek qatynastary salasyndaǵy zańnamasyn jetildirý maqsatynda ázirlendi.

Qazaqstan Respýblıkasynyń Eńbek kodeksine mynalarǵa baǵyttalǵan normalar qarastyrylǵan:

— eńbek salasyndaǵy ar-namys pen qadir-qasıetti qorǵaý boıynsha eńbek zańnamasynyń qaǵıdattary men kepildikterin tolyqtyrý bóliginde jumysshylardyń zańdy múddelerin saqtaý;

— jergilikti atqarýshy organdardyń óńirlik deńgeıde áleýmettik áriptestikti uıymdastyrý, memlekettik eńbek ınspektsııasymen, jumyskerler men jumys berýshiler ókilderimen ózara is-qımyl jasaý, sondaı-aq áleýmettik áriptestik pen áleýmettik-eńbek qatynastaryn retteý jónindegi óńirlik úshjaqty komıssııalardyń qyzmetin qamtamasyz etý jónindegi ókilettikterin bekitý;

— sońǵy jumys kúni ýaqytsha eńbekke jaramsyzdyq nemese áleýmettik demalys kezeńimen sáıkes kelgen kezde ony anyqtaý tártibin naqtylaý;

— jumyskerdiń aýysym aldyndaǵy medıtsınalyq kýálandyrýdan ótýine jumsaǵan ýaqytyna aqy tóleýdi ujymdyq shartta nemese jumys berýshiniń aktisinde aıqyndalatyn mólsherde belgileý;

— jumys berýshiniń jumyskerge eńbek jaǵdaılarynyń ózgergeni týraly jazbasha habarlaý mindetin belgileý;

— memlekettik eńbek ınspektorlary úshin eńbek qatynastary, eńbek qaýipsizdigi jáne eńbekti qorǵaý, sondaı-aq áleýmettik áriptestik salasynda biliktiligin júıeli túrde arttyryp otyrý mindettemesin engizý;

— eńbekti qorǵaý jónindegi tehnıkalyq ınspektorlardyń quqyqtaryn bekitý.

Sonymen qatar, «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańyna jergilikti basqarý organdarynyń eńbek, eńbek qaýipsizdigi jáne eńbekti qorǵaý salasyndaǵy memlekettik saıasattyń iske asyrylýyn qamtamasyz etý mindetin belgileýge baǵyttalǵan normalar engiziledi.

Budan buryn habarlanǵandaı, Eńbek mınıstrligi áleýmettik qyzmetterge baqylaýdy kúsheıtpek.