«Eńbek» kásipornynyń qyzmetkeri ustalǵany ras pa: UQK jaýap berdi

ASTANA. KAZINFORM – «Eńbek» respýblıkalyq memlekettik kásipornynyń qyzmetkeri ustaldy degen aqparat taraǵannan keıin QR Ulttyq qaýipsizdik komıteti sotqa deıingi tergep-tekserý júrip jatqanyn rastady.

QR UQK
Foto: QR UQK

Buǵan deıin buqaralyq aqparat quraldarynda ózge qyzmettermen qatar sottalǵandardy tamaqpen qamtamasyz etýmen aınalysatyn «Eńbek» kásipornynyń qyzmetkeri ustalǵany týraly habar taraǵan edi.

UQK Kazinform redaktsııasynyń resmı saýalyna bergen jaýabynda tergeý júrgizilip jatqanyn málimdedi.

– Sotqa deıingi tergep-tekserý júrgizilip jatqanyn habarlaımyz. Qylmystyq-protsestik kodekstiń 201-babynyń 1-bóligine sáıkes ózge aqparat jarııa etilmeıdi, – delingen komıtettiń jaýabynda.

Alaıda UQK tergeýdiń kimge qatysty júrgizilip jatqanyn naqtylamady. 

Keıin Qylmystyq-atqarý júıesi komıteti bul máselege túsinikteme berdi. Vedomstvonyń málimetinshe, ІІM Ózindik qaýipsizdik departamenti UQK Sybaılas jemqorlyqqa qarsy is-qımyl qyzmetimen birlesip jedel is-sharalar júrgizgen. Sonyń nátıjesinde «Eńbek» RMK-nyń tamaqtandyrýǵa jaýapty bólimshesi menedjerleriniń biriniń zańsyz áreket etý faktileri anyqtalǵan.

ıAǵnı kásiporyn basshylyǵy emes, onyń qurylymdyq bólimsheleriniń birindegi qyzmetker ustalǵan.

«Eńbek» RMK bas dırektorynyń ustalǵany týraly aqparat shyndyqqa sáıkes kelmeıdi.

Buǵan deıin Kazinform 2025 jyldyń qańtarynda «Eńbek» RMK bas dırektorynyń orynbasary men kásiporynnyń qurylys basqarmasynyń bastyǵy kásipkerlerden júıeli túrde para aldy degen kúdikke ilingenin habarlaǵan edi.

Tergeý nusqasyna sáıkes, olar memlekettik satyp alý sharttaryn jasasý, oryndalǵan jumystardyń aktilerine qol qoıý jáne sol jumystardyń aqysyn tóleý úshin para alǵan. Kúdiktiler sot sanktsııasymen qamaýǵa alyndy.

Bıyl qyrkúıekte Pavlodar oblysynyń prokýratýrasy sottalǵandardy jalǵan jumysqa ornalastyrýdyń 289 deregin anyqtady. Tıisti buıryqtardy «Eńbek-Pavlodar» fılıaly rásimdegen. Tekserý nátıjesinde kináli laýazymdy tulǵalar tártiptik jaýapkershilikke tartyldy.

Aıta keteıik, «Eńbek» RMK – elimizdiń qylmystyq-atqarý júıesi mekemelerindegi negizgi jumys berýshilerdiń biri. Kásiporyn sottalǵandardy tamaqpen qamtamasyz etedi, ónim óndiredi, qurylys jumystaryn júrgizedi. Budan bólek, ózge de qyzmet túrlerimen aınalysady. 2025 jyldyń naýryzyndaǵy ashyq derekke sáıkes, elimizdiń qylmystyq-atqarý júıesi mekemelerinde 12 myńǵa jýyq sottalǵan adam jumyspen qamtylǵan.