Eńbek ınspektorlary 24,7 myńnan astam jumyskerdiń quqyǵyn qorǵady

NUR-SULTAN. QazAqparat - 1 qazandaǵy jaǵdaı boıynsha memlekettik eńbek ınspektorlary respýblıkanyń 891 kásipornynda 25,9 myń jumysker aldynda jalaqy boıynsha 2,7 mlrd teńgeden asa qaryz bar ekenin anyqtady, dep habarlaıdy QazAqparat tilshisi.

QR Eńbek jáne áleýmettik qorǵaý mınıstrligi baspasóz qyzmetiniń málimetine qaraǵanda, atalǵan kásiporyndardyń jetekshilerine oryndalýǵa mindetti 511 nusqama berilip, 71,5 mln teńgeden astam somaǵa aıyppul salynǵan.

Qoldanylǵan sharalardyń nátıjesinde, sonymen qatar jalaqy boıynsha qaryzdy óteýdiń merzimi men kestesin qatań belgileý arqyly 24,7 myńnan astam jumyskerdiń quqyǵy qorǵalyp, nátıjesinde olarǵa 2,76 mlrd teńge tólendi.

Jalpy, joǵaryda kórsetilgen kezeńde memlekettik eńbek ınspektorlary 2,9 myń tekserý júrgizdi. 4,5 myńnan asa QR eńbek zańnamasyn buzý faktilerin anyqtalyp, 137,9 mln teńge somaǵa aıyppul salyndy.