Eńbek ınspektorlary jumys berýshini teksergende qandaı qujattarǵa nazar aýdarady
ASTANA. KAZINFORM – Eńbek zańnamasynyń saqtalýyn baqylaý kezinde memlekettik eńbek ınspektorlary jumys berýshiniń birqatar qujatyn tekseredi. Bul týraly Astana qalasy boıynsha Memlekettik eńbek ınspektsııasy komıteti departamenti basshysynyń orynbasary Murat Shákenov málimdedi.
Tekserý barysynda eńbek sharttary men jumys berýshiniń aktileri, jumys ýaqytynyń esebi, eńbekaqy tóleýge qatysty qujattar jáne laýazymdyq nusqaýlyqtar qaralady.
– Memlekettik baqylaý kezinde eńbek shartyn durys rásimdemeý, ony jasasý nemese ózgertý tártibin buzý faktileri anyqtalýy múmkin. Sondaı-aq eńbek qatynastarynyń naqty jaǵdaılaryn qujattarda durys kórsetpeý, jumys ýaqyty men eńbekaqyǵa qatysty talaptardy saqtamaý da nazarǵa alynady, - dedi vedomstvo ókili.
Murat Shákenovtiń aıtýynsha, eńbek shartyn zań talaptaryna saı rásimdeý qyzmetkerdiń quqyqtaryn qorǵaýǵa, taraptardyń mindettemelerin naqtylaýǵa jáne eńbek daýlarynyń aldyn alýǵa múmkindik beredi.
Aıta keteıik, buǵan deıin qyzmetker ústeme jumysqa shyqsa, qansha aqy alýy tıis ekeni jóninde jazdyq.
