Eńbek ınspektorynyń ókilettigi kúsheıtiledi
ASTANA. KAZINFORM — Eńbekti qorǵaý máseleleri boıynsha Biryńǵaı oqý-ádistemelik ortalyq qurylady. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev málim etti.
- Eńbek qaýipsizdigi jáne eńbekti qorǵaý júıesin odan ári jetildirý maqsatynda kadrlardy daıarlaý sapasyn arttyrýǵa baǵyttalǵan sharalar keshenin iske asyrý eskerilgen. Normatıvtik jetildirý sheńberinde 321 memlekettik eńbek ınspektorynyń ókilettigi men fýnktsıonalyn kúsheıtý josparlandy. Kásiporyndarda tikeleı qoǵamdyq baqylaýdy júzege asyratyn eńbekti qorǵaý jónindegi 16 myńnan astam tehnıkalyq ınspektorlardyń qyzmeti jetildiriledi, - dedi A. Ertaev.
Onyń aıtýynsha, óndiristik keńesterdiń qyzmet mehanızmderin jetildirý jáne jumyskerlerdiń qaýipsiz eńbek jaǵdaılaryn qamtamasyz etý máselelerine qatysýyn keńeıtý arqyly 18 myń óndiristik keńestiń jumys tıimdiligin arttyrýǵa erekshe kóńil bólinedi.
- Kadr daıarlaýdyń biryńǵaı júıesin qalyptastyrý maqsatynda eńbek qaýipsizdigi jáne eńbekti qorǵaý máseleleri boıynsha Biryńǵaı oqý-ádistemelik ortalyq qurý kózdelgen. Eńbekti qorǵaý máseleleri boıynsha oqytý men bilimdi tekserý rásimderiniń arajigin ajyratý josparlandy. Bul jumyskerlerdiń daıyndyq deńgeıin baǵalaýdyń obektıvtiligin qamtamasyz etýge múmkindik beredi. Protsesterdi tsıfrlandyrý aıasynda Biryńǵaı tsıfrlyq júıege bilimdi proktorıngtik onlaın-tekserý mehanızmin, sondaı-aq tekserý nátıjelerin apellıatsııalyq qaraý rásimin engizý kózdelip otyr. Oqytý uıymdary jáne Biryńǵaı tsıfrlyq júıede oqýdan ótkeni týraly sertıfıkattardy tirkeý qamtamasyz etiledi. Bul oqytý protsesteriniń ashyqtyǵyn arttyrýǵa, daıarlaý sapasyn baqylaýdy qamtamasyz etýge jáne jalǵan qujattardy berý jaǵdaılaryn joıýǵa múmkindik beredi, - dedi vedomstvo basshysy.
Buǵan deıin habarlanǵandaı, Asqarbek Ertaev 480 myńǵa jýyq adam eńbek jaǵdaılary zııandy jáne qaýipti jumystarda isteıtinin aıtty.
