Eńbek ımmıgranttaryna salynatyn salyq 2 AEK quraıdy
ASTANA. 13 qańtar. QazAqparat - Astana qalasy boıynsha Salyq departamentiniń habarlaýynsha, eńbek ımmıgranttaryna salynatyn salyq 2 aılyq eseptik kórsetkishti (3704 teńge) quraıdy.
«Úı sharýasymen aınalysatyn eńbek ımmıgranttary salyqtyq kezeń ishinde jeke tabys salyǵy boıynsha jumys istegen (qyzmet kórsetken) árbir aı úshin 2 aılyq eseptik kórsetkish mólsherinde (3 704 teńge) aldyn ala tólem jasaıdy. Aldyn ala tólem eńbek ımmıgrantynyń ornalasqan jeri boıynsha kóshi-qon polıtsııasy organdarynyń ruqsatyn alǵanǵa deıin (uzartqansha) bıýdjetke tólenedi», - dep habarlady astana.kz saıtyna qalalyq Departamentten.
Jyl sońynda kóship-qonýshy jeke tabys salyǵy somalaryn esepteıdi.
Vedomstvonyń atap ótýinshe, eńbek ımmıgrantynyń tabysy ruqsat etilgen kezeń ishinde jumystardy oryndaýdan túsken kiris mólsherinen turady.
«Salyq salynatyn tabysty anyqtaý úshin jalpy tapqan tabys somasynan ár aıǵa zańmen belgilengen bir rettik eń tómengi eńbekaqy alynyp tastalady, al qalǵan somaǵa 10 paıyz mólsherlemesi boıynsha jeke tabys salyǵy salynady», - delingen habarlamada.
Aıta keteıik, aldyn ala tólengen salyq somasy is júzinde eseptelgen somadan tómen bolǵan kóship-qonýshylar ǵana jyl sońynda deklaratsııa tapsyrady.
Bul deklaratsııa eseptik jyldan keıingi jyldyń 31 naýryzyna deıin usynylýy tıis. Bıýdjetpen túpkilikti esep aıyrysý sol jyldyń 10 sáýirine deıin aldyn ala tólengen tólemderdi esepteı otyryp júrgiziledi. Eńbek ımmıgranttarynyń osy sanattary merziminen buryn elden ketken jaǵdaıda ornalasqan orny boıynsha salyq organdaryna ketetin merzimine deıin deklaratsııa tapsyryp, salyq tóleıdi.
