Eńbek ımmıgranttaryna arnalǵan memlekettik qyzmet tolyqtaı onlaın formatqa kóshiriledi
ASTANA. KAZINFORM – 2026 jylǵy 13 sáýirden bastap Qazaqstanda eńbek ımmıgranttaryna jumysqa ruqsat berý jáne ony uzartý boıynsha memlekettik qyzmet HQKO-larda qoljetimsiz bolyp, ótinimdi tek onlaın túrde berýge bolady.
Eńbek ımmıgranttaryna ruqsat berý jáne ony uzartý qyzmeti onlaın formatqa aýystyrylyp, tek eGov.kz portaly arqyly qoljetimdi boldy. Jańartý Halyqqa qyzmet kórsetý ortalyqtaryna barý qajettiligin joıyp, qujattardy rásimdeý protsesin jeńildetti.
Endi shetel azamattary Qazaqstan aýmaǵynda jeke tulǵalardyń úı sharýashylyǵynda jumys isteý úshin ruqsatty onlaın túrde rásimdeı nemese uzarta alady. Paıdalanýshylarǵa keıbir qujattardy qolmen júkteýdiń qajeti joq. Mysaly, medıtsınalyq anyqtama men saqtandyrý týraly málimetter memlekettik júıelerden avtomatty túrde tartylatyn bolady. Bul ótinim berý ýaqytyn qysqartyp, qatelikterdiń týyndaý yqtımaldyǵyn azaıtady.
– Búginde eGov.kz elektrondyq úkimet portalynda eńbek ımmıgranttaryna ruqsat berý qyzmeti boıynsha barlyq qajetti ıntegratsııalar tolyq júzege asyrylǵan. Olardyń ishinde medıtsınalyq tekserýden ótý, saqtandyrý jáne salyq tólemderin avtomatty túrde tekserý bar. Memlekettik qyzmetterdiń onlaın formatqa qarqyndy kóshýin jáne olardyń táýlik boıy qoljetimdiligin eskere otyryp, 13 sáýirden bastap bul qyzmetti HQKO arqyly kórsetý toqtatylady. Endi ótinimder tek egov.kz nemese migration.enbek.kz arqyly onlaın túrde qabyldanady, - dedi Jasandy ıntellekt jáne tsıfrlyq damý mınıstrliginiń birinshi vıtse-mınıstri Rostıslav Konıashkın.
Ruqsat berý nemese ony uzartý týraly sheshimdi aýdan jáne oblystyq mańyzy bar qalalardyń jergilikti atqarýshy organdary ishki ister organdarymen kelisý arqyly qabyldaıdy. Ruqsat eńbek ımmıgranttaryn tartýǵa belgilengen kvota sheginde 1 aıdan 12 aıǵa deıingi merzimge beriledi. Memlekettik qyzmetti alý boıynsha qosymsha aqparat eGov.kz portalynda jáne onyń áleýmettik jelilerinde jarııalanǵan.
Jańartý QR Jasandy ıntellekt jáne tsıfrlyq damý mınıstrliginiń Memlekettik qyzmetter komıteti, «Ulttyq aqparattyq tehnologııalar» AQ, «Azamattarǵa arnalǵan úkimet» KEAQ, QR Іshki ister mınıstrligi, Densaýlyq saqtaý mınıstrligi, QR Eńbek jáne halyqty áleýmettik qorǵaý mınıstrligi jáne Memlekettik kredıttik bıýronyń birlesken jumysynyń nátıjesinde júzege asyryldy.
Buǵan deıin habarlaǵanymyzdaı, eGov.kz eńbek ımmıgranttaryna ruqsat berý jáne ony uzartý tártibin jańartty.
