Eńbek etýge qabiletti sottalǵandardyń 35 paıyzy ǵana jumyspen qamtylǵan
ASTANA. Shildeniń 23-i. QazAqparat /Marlan Jıembaı/ - Búgin elorda ákimdiginiń ǵımaratynda Astana qalalyq kásipkerlik jáne óndiris basqarmasynyń kómegimen QR Ádilet mınıstrliginiń Qylmystyq atqarý júıesi komıteti «Eńbek» memlekettik kásiporny fılıaldarynyń óndiristik taýarlar kórmesi ótýde.
Elordada alǵash ret uıymdastyrylǵan kórmege elimizdiń túzeý mekemelerinde jazasyn ótip jatqan azamattardyń qoldarynan shyqqan qurylys materıaldary, qosalqy jóndeý bólshekteri, metall buıymdar, kóshe shamdary men oryndyqtar, kommýnaldyq-turmystyq buıymdar, balalar oıyn alańdaryna qajetti jabdyqtar, keńse jıhazdary, qyzmet kórsetý salasynyń kıimderi, tósek jabyndylary, qolóner buıymdary qoıylǵan.
«Búgingi tańda memleket tarapynan tapsyrys azdaý bolyp otyr. Soǵan qaramastan bizdiń kásiporyndar kóptegen jumystar atqarýda. «Jol kartasy» boıynsha, sonymen qatar jergilikti aqtarýshy organdardyń kómegimen tapsyrystar alyp jatyrmyz», deıdi Qylmystyq atqarý júıesi komıteti tóraǵasynyń orynbasary mindetin atqarýshy Bedelhan Noǵaıbaev.
Іs-sharanyń negizgi maqsaty kelýshilerdi túzeý mekemeleri kásiporyndarynyń óndiris múmkindikterimen tanystyrý, óndirilgen ónimge tapsyrys alý, jańa jumys oryndaryn ashý arqyly sottalǵandardy jumyspen qamtý deńgeıin arttyrý ekendigin atap ótken ol «jyl saıyn bizde 7 mıllıard teńgege jýyq qarjynyń taýarlary shyǵady. Al aǵymdaǵy jyly bul kórsetkishti 8 mıllıardtan asyramyz dep josparlap otyrmyz. Óıtkeni osyndaı kórmelerdiń arqasynda jyl saıyn tapsyrys kóbeıip kele jatyr», deıdi.
Onyń atap ótýinshe, bundaı kórmeler ótken jyly Óskemende, Pavlodarda, aǵymdaǵy jyly Petropavl, Taraz, Shymkent qalalarynda ótkizilgen.
B.Noǵaıbaevtyń sózine qaraǵanda, búgingi tańda eńbek etýge qabiletti sottalǵandardyń 35 paıyzy ǵana jumyspen qamtylǵan. Olar memlekettik kásiporyndarmen qatar jeke fırmalarda, mekemelerde, túzeý oryndarynyń sharýashylyqtarynda eńbek etýde.
