Eńbek etý qabiletinen aıyrylǵan jaǵdaıda tólem alýǵa ótinimdi elektrondyq formatta berýge bolady

NUR-SULTAN. QazAqparat - Eńbek etý qabiletinen aıyrylǵan jaǵdaıda Memlekettik áleýmettik saqtandyrý qorynan áleýmettik tólem taǵaıyndaý boıynsha memlekettik qyzmetti alýǵa ótinishti endi elektrondyq úkimet portaly (eGov.kz portaly) arqyly berýge bolady, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

Buryn ótinishter HQKO jáne medıtsınalyq-áleýmettik saraptama (budan ári – MÁS) bólimderi arqyly qaǵaz túrinde qabyldanǵan edi.

Qyzmet kórsetýdiń jańa onlaın-formaty QR Eńbek jáne halyqty áleýmettik qorǵaý mınıstrligi men QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń birlesken jumysynyń arqasynda iske asyryldy.

eGov.kz portaly arqyly «Otbasylarǵa kómek» bóliminde ótinish berý úshin «Eńbek etý qabiletinen aıyrylý jaǵdaıyna áleýmettik tólem taǵaıyndaý» tarmaǵyn tańdaý qajet.

Osydan keıin paıdalanýshy portalda avtorızatsııalanýy, onlaın qyzmetke tapsyrys berýi, barlyq mindetti málimetterdi toltyrýy jáne ótinimge elektrondyq-tsıfrlyq qoltańbamen qol qoıýy qajet.

Qyzmet kórsetý merzimi 8 jumys kúnin quraıdy. Eńbek etý qabiletinen aıyrylý jaǵdaıyna áleýmettik tólem taǵaıyndaý týraly habarlama nemese bas tartý týraly dáleldi jaýap paıdalanýshynyń jeke kabınetine jiberiledi.

Qyzmetti alý úshin múgedektiktiń bolýy jáne eńbek etý qabiletinen aıyrylý dárejesi týraly aqparat (MÁS bóliminiń qorytyndysy), sondaı-aq Memlekettik áleýmettik saqtandyrý qoryna áleýmettik aýdarymdardyń jaı-kúıi jáne oǵan sońǵy 24 aıda túsken túsimder týraly derekter talap etiledi, olar Eńbekmıniniń aqparattyq júıelerinen avtomatty túrde tekseriledi.