Eńbek demalysyna shyqqandar epıdahýaldy ýshyqtyrýda – Janna Pralıeva
NUR-SULTAN. QazAqparat – Nur-Sultan qalasy bas sanıtar dárigeriniń orynbasary Janna Pralıeva jazǵy eńbek demalysyna shyqqan turǵyndardyń jaýapsyzdyǵy epıdemıologııalyq ahýaldy ýshyqtyrǵanyn málim etti, dep habarlaıdy QazAqparat tilshisi.
«Aýrýdyń taralýy kúrt artýyna jazǵy eńbek demalystary men kanıkýldar da da sebep bolyp otyr. Adamdar el ishinde qaladan-qalaǵa kóp qatynap jatyr. Sapar barysynda qorǵanys sharalaryn saqtamaıdy. Maska rejımin ustanbaı, adamdar kóp shoǵyrlanatyn sharalarǵa jıi barady. Aýrý juqtyrǵandardyń 53 paıyzy saýda jáne qoǵamdyq tamaqtaný oryndaryna, kóńil kóterý mekemelerine barǵan. 34 paıyzy úı jaǵdaıynda juqtyrsa, 17 paıyzy jumys ornynda aýrýǵa shaldyqqan. Bul jumys oryndarynda da maska rejımi men áleýmettik qashyqtyq saqtalmaıtynyn kórsetedi», - dedi maman qalalyq ákimdiktiń onlaın brıfınginde.
Janna Pralıeva eńbek ujymdarymen birge qyzmet kórsetý nysandary da saqtyq sharalaryn kózge ilmeı otyrǵanyn jetkizdi. Tekserýler men reıdter kezinde qyzmetine shekteý qoıylǵan mekemeler izin ala óz betimen jumysyn jalǵastyrǵan jaıttar tirkelgen.
