Eńbek daýynyń aldyn alý: táýekel deńgeıin anyqtaý kartasynyń nátıjesi
ASTANA. KAZINFORM — Búgin Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev Eńbek táýekelderi kartasyna qatysty túsinik berdi.
- Áleýmettik shıelenisti ýaqtyly anyqtaý jáne eńbek janjaldarynyń aldyn alý maqsatynda Mınıstrlik Eńbek táýekelderi kartasy arqyly áleýmettik-eńbek salasynyń monıtorıngin júrgizedi. Búginde monıtorıng 98 myń kásiporyndy qamtyǵan. Táýekel deńgeıin baǵalaý nátıjeleri boıynsha joǵary sanatqa 2 myń 300 kásiporyn, ortasha sanatqa 3 myń 200 kásiporyn kiredi, - dedi A. Ertaev.
Eńbek táýekelderi kartasy kásiporyndardaǵy áleýmettik-eńbek ahýaly týraly aqparatty taldaýǵa, jumys berýshilerdi eńbek zańnamasyn buzý belgileri týraly proaktıvti túrde anyqtaýǵa jáne habardar etýge yqpal etedi. Karta arqyly jasalǵan monıtorıng kásiporyndardaǵy ahýaldy aýdan deńgeıine deıin baqylaýǵa múmkindik beredi.
- Ákimderge, eńbek ınspektsııasyna jáne quqyq qorǵaý organdaryna jedel analıtıkalyq aqparat daıyndaýǵa jaǵdaı jasaıdy. Aldyn alý sharalaryn qabyldaýǵa jáne eńbek janjaldaryn boldyrmaýǵa kómektesedi. Bıyl kartany qarjy, ádilet, densaýlyq saqtaý mınıstrlikteriniń, Bas prokýratýranyń aqparattyq júıelerimen qosymsha ıntegratsııalaý qajet. Jalpy, qoldanystaǵy tsıfrlyq sheshimder kásiporyndardyń jumysyn onlaın rejıminde baqylap, taldaýǵa múmkindik beretin tolyq jumys isteıtin ahýaldyq ortalyqty qurýǵa jaǵdaı jasaıdy, - dedi mınıstr.
Buǵan deıin habarlanǵandaı, Asqarbek Ertaev 480 myńǵa jýyq adam eńbek jaǵdaılary zııandy jáne qaýipti jumystarda isteıtinin aıtty.
