Eńbek daýy: Tarazda myńdaǵan adamǵa tólenbeı kelgen ótemaqy qaıtaryldy
ASTANA. KAZINFORM — Jambyl oblysynyń mamandandyrylǵan tabıǵat qorǵaý prokýratýrasy Jambyl oblysy ákimdigi veterınarııa basqarmasynyń oblystyq veterınarııalyq stantsııasynyń qyzmetinde eńbek zańnamasynyń saqtalýyna tekserý júrgizdi. Bul týraly prokýratýra málim etti.
— Qadaǵalaý is-sharalarynyń nátıjesi boıynsha eńbek zańnamasy talaptarynyń óreskel buzylýy anyqtaldy, bul qyzmetkerlerdiń zańmen kepildendirilgen ótemaqy tólemderin ýaqtyly alýǵa konstıtýtsııalyq quqyqtaryna nuqsan keltirýge ákep soqtyrǵan, — dep jazdy quzyorly organnan.
Kásiporyn 1 010 qyzmetkerge zııandy eńbek jaǵdaılarynda jumys istegeni úshin qosymsha tólemderdi ýaqtyly tólemegeni anyqtaldy.
— Bul rette veterınarlyq dárigerler asa qaýipti ınfektsııalar men janýarlardyń aýrýlaryn juqtyrý qaýpimen baılanysty eńbek qyzmetin júzege asyrady. Zańnama talaptaryna qaıshy, 2025 jyly jasalǵan ujymdyq shartta aýyr jumystarmen, sondaı-aq zııandy jáne qaýipti eńbek jaǵdaılary bar jumystarmen aınalysatyn qyzmetkerlerge qosymsha aqy tóleý júıesin kózdeıtin mindetti erejeler kórsetilmegen, — delingen habarlamada.
Prokýrorlyq qadaǵalaý aktisi negizinde ujymdyq shartty zańnama talaptaryna sáıkes keltirý jóninde sharalar qabyldandy, sondaı-aq qyzmetkerlerge tıesili qosymsha tólemder boıynsha bereshekti tolyq óteý qamtamasyz etildi.
Kináli laýazymdy tulǵalar zańmen belgilengen jaýaptylyqqa tartyldy.
Atalǵan saladaǵy zańdylyqtyń jaı-kúıi prokýratýranyń erekshe baqylaýynda.
Aıta keteıik, Qazaqstanda 95 kásiporynda eńbek daýy qaralyp jatyr.
