Eńbek bırjasynda jalaqysy 2 mln teńgeden asatyn jumys oryndary jarııalandy
ASTANA. KAZINFORM — Qyrkúıek aıynyń basynan beri Enbek.kz Elektrondyq eńbek bırjasynda jumys berýshilerdiń belsendiligi joǵary deńgeıde saqtalyp otyr. Búginde platformada 105 907 ózekti bos jumys orny bar.
Eńbek jáne halyqty áleýmettik qorǵaý mınıstrliginiń baspasóz qyzmetiniń málimetinshe, tamyz aıynda jumys berýshiler jarııalaǵan bos jumys oryndarynyń sany shildemen salystyrǵanda 25,8%-ǵa artyp, 131,6 myńǵa jetti. Al jumys izdeýshiler 145,2 myń túıindeme ornalastyrǵan. Bul shildedegi kórsetkishten 2,8%-ǵa joǵary.
Sonyń nátıjesinde bir aıdaǵy bos jumys oryndary men túıindemeler arasyndaǵy aıyrmashylyq 2,5 eseden astam qysqardy. Shildede bul aıyrmashylyq 36,6 myń bolsa, tamyzda 13,6 myńǵa deıin azaıdy.
Jalpy, 2026 jyldyń basynan beri Enbek.kz platformasynda 840,6 myń bos jumys orny jáne 1 022,4 myń túıindeme ornalastyrylǵan.
Tamyz aıynda eń kóp bos jumys orny bilim berý salasynda tirkeldi — 61 myń. Bul jańa oqý jyly qarsańynda mamandarǵa degen suranystyń artqanyn kórsetedi.
Sonymen qatar bos jumys oryndary qyzmet kórsetý, densaýlyq saqtaý jáne áleýmettik qyzmet kórsetý, óńdeý ónerkásibi, aýyl, orman jáne balyq sharýashylyǵy, qurylys salalarynda da kóp boldy.
Óńirler boıynsha eń kóp bos jumys orny Astana men Almatyda jarııalanǵan — ár qalada shamamen 10 myńnan.
Tamyzdaǵy bos jumys oryndarynyń 46,6%-y joǵary bilikti mamandarǵa, 33,1%-y orta bilikti mamandarǵa, 20,3%-y tómen bilikti jumysshylarǵa arnalǵan.
Al jumys izdeýshiler ornalastyrǵan túıindemelerdiń 46,5%-y joǵary bilikti, 35,5%-y orta bilikti, 18%-y tómen bilikti mamandarǵa tıesili.
Jumys izdeýshilerdiń arasynda 35 jasqa deıingi azamattar basym. 35–44 jastaǵylardyń úlesi — 25,8%, 45–54 jastaǵylar — 14,6%, al 55 jastan asqandar — 6,7%.
Túıindemelerdiń 60,6%-yn áıelder, 39,4%-yn erler ornalastyrǵan.
— Ótken aıda Enbek.kz platformasynda 1 mln teńgeden joǵary jalaqy usynylǵan bos jumys oryndary da boldy. Olardyń qatarynda taý-ken óndirisindegi aýysym bastyǵynyń jalaqysy shamamen 2,06 mln teńge, kıberqaýipsizdik mamany 2 mln teńgege, al kenish dırektorynyń jalaqysy 1,63 mln teńgege jýyq boldy. Al jalaqy boıynsha eń joǵary talaptar ákimshilik bólim basshylarynda shamamen 2,02 mln teńge, jańa ónimderdi ázirleý jobalarynyń jetekshilerinde 1,84 mln teńge, satý jónindegi sheberlerde 1,75 mln teńge deńgeıinde tirkeldi, — delingen habarlamada.
Jalpy, Elektrondyq eńbek bırjasyndaǵy derekter elimizdegi jumys kúshine degen suranystyń salalar, mamandyqtar men óńirler boıynsha keń ekenin kórsetedi.
Tsıfrlyq platforma jumys berýshilerge bos jumys oryndaryn jedel jarııalaýǵa, al azamattarǵa óz bilimi men tájirıbesine sáıkes jumys tabýǵa múmkindik beredi.
Budan buryn eńbek bırjasynda múgedektigi bar azamattarǵa 16,7 myń jumys orny usynyldy.
