Eńbek bırjasynda múgedektigi bar azamattarǵa 16,7 myń jumys orny usynyldy
ASTANA. KAZINFORM – Qazaqstanda múgedektigi bar adamdardy jumyspen qamtýǵa baǵyttalǵan sharalar aıasynda elektrondyq eńbek bırjasynda jumys berýshilerdiń arnaıy tizbesi jarııalandy.
Eńbek jáne halyqty áleýmettik qorǵaý mınıstrliginiń málimetinshe, Áleýmettik kodekske sáıkes jumys berýshiler belgilengen kvota sheńberinde osy sanattaǵy azamattardy jumysqa ornalastyrýdy qamtamasyz etedi.
2026 jyly kvota 2,6 myń jumys berýshige belgilenip, 16,7 myń jumys ornyn qamtyp otyr. Bul múgedektigi bar azamattardyń turaqty tabys taýyp, kásibı áleýetin júzege asyrýyna múmkindik beredi.
– Kvotalaýǵa qatysatyn jumys berýshilerdiń tizbesi aýdandar men qalalar bólinisinde elektrondyq eńbek bırjasynda jarııalandy. Bul jumys izdeýshilerge óz óńirinde qolaıly bos jumys oryndaryn jyldam tabýǵa múmkindik beredi, – delingen mınıstrlik málimetinde.
Vedomstvonyń habarlaýynsha, jumys oryndaryn kvotalaý tek jańa jumys oryndaryn ashýmen shektelmeı, ınklıýzıvti eńbek naryǵyn qalyptastyrýǵa baǵyttalǵan mańyzdy tetik bolyp tabylady.
– Mınıstrlik múgedektigi bar adamdar úshin aqparattyń qoljetimdiligin arttyrýǵa, kvotanyń oryndalýyn monıtorıngileý men baǵalaý júıesin jetildirýge, sondaı-aq 50-den astam qyzmetkeri bar jumys berýshiler úshin kvotalardy avtomattandyrylǵan esepke alýdy engizýge basymdyq beredi. Sonymen qatar mansap ortalyqtary jumys berýshilerge kvotalanatyn oryndarǵa kandıdattardy irikteýde praktıkalyq qoldaý kórsetedi, – dep atap ótilgen.
Aıta keteıik, bıyl múgedektigi bar adamdar ınvataksı qyzmetine 112 myńnan astam tapsyrys berdi.
