«Eńbek» baǵdarlamasyna jyl basynan 109,7 myń adam qatysty

NUR-SULTAN. QazAqparat - 1 naýryzdaǵy málimet boıynsha, Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyna 109,7 myń adam qatysty, dep habarlaıdy QazAqparat.

«100,4 myń adam jumysqa ornalastyryldy, onyń 32,8 myńy – turaqty jumysqa. Baǵdarlamanyń birinshi baǵyty aıasynda qysqa merzimdi kýrstarǵa 236 adam jiberildi.

Óz isin ashý úshin 1,2 myń adam memlekettik grant aldy.

Sýbsıdııalanatyn jumys oryndaryna 68,6 myń adam jumysqa ornalastyryldy, onyń ishinde: áleýmettik jumys oryndaryna – 9,7 myń; jastar praktıkasyna – 5,1 myń; qoǵamdyq jumystarǵa – 53,8 myń adam», - dedi QR Eńbek jáne halyqty áleýmettik qorǵaý mınıstrliginen.Sondaı-aq málim etilgendeı, eńbek resýrstarynyń utqyrlyǵy sheńberinde 35 otbasy nemese 97 adam qonys aýdardy, onyń ishinde 47 adam eńbekke qabiletti jasta. Eńbekke qabiletti 23 adam kóshken jeri boıynsha turaqty jumys ornyna ornalastyryldy.

Aıta keteıik, 2020 jyly «Eńbek» memlekettik baǵdarlamasyna 649 myń adam qatysty. 437,3 myń adam jumysqa ornalastyryldy, onyń 319,2 myńy turaqty jumysqa turdy. Jappaı kásipkerlikti damytýǵa 12,7 myń mıkrokredıt jáne jańa bıznes-ıdeıalardy iske asyrýǵa 44,9 myń memlekettik qaıtarymsyz grant berildi.

Qysqa merzimdi oqytý kýrstaryna 18,7 myń adam jiberildi, al TjKB uıymdarynda oqytýmen 18,4 myń adam qamtyldy.

Budan basqa, eńbek resýrstarynyń utqyrlyǵyn arttyrý sheńberinde jumys kúshi artyq óńirlerden quramynda 5,8 myń adam bar 1,8 myń otbasy qonys aýdardy.