«Eńbek» baǵdarlamasyna qatysqan 184 myń adam jumysqa ornalasty
«Búgingi tańda 255 myń jumys ornyn, onyń ishinde aıaqtalǵan jobalarda 15 myń turaqty jumys ornyn qurý josparlanǵan 6,5 myń áleýmettik mańyzy bar joba iriktep alyndy. Shamamen 5,9 myń jobanyń iske asyrylýy bastalyp ketti. Onda 123 myń jumys orny qurylǵan. Jumyspen qamtýdyń jol kartasy irgeles salalarda 100 myńnan astam turaqty jumys oryndaryn qurýdyń negizin qalaıdy», - dedi Rýslan Dálenov OKQ-da ótip jatqan baspasóz máslıhatynda.
Onyń aıtýynsha, 262 myńnan astam adam «Eńbek» memlekettik baǵdarlamasynyń qatysýshysy bolǵan. Onyń ishinde 184 myńy jumysqa ornalastyrylǵan.
«Kólik ınfraqurylymyn aýqymdy jańǵyrtý jáne halyqty jumyspen qamtamasyz etý maqsatynda «Nurly jol» memlekettik baǵdarlamasy aıasynda 5,5 myń shaqyrym respýblıkalyq jáne 4 myń shaqyrymdyq jergilikti joldardy salý jáne qaıta jańartý jumystary júrgizilip jatyr. Jalpy jol-qurylys jumystaryna 200 myń adam tartyldy», - dedi ol.
