«Eńbek» baǵdarlamasy: ShQO-da kolledj túlekteriniń 90 paıyzy jumysqa ornalasty

ÓSKEMEN. QazAqparat – Shyǵys Qazaqstan oblysynda «Eńbek» baǵdarlamasy aıasynda kolledj túlekteriniń 90 paıyzy jumysqa ornalasty, dep habarlaıdy QazAqparat tilshisi.

ShQO ákimdiginiń málimetine súıensek, óńirde «Eńbek» baǵdarlamasy júzege asyrylyp jatyr. Mundaǵy maqsat – kadrlardy oqytý jáne daıarlaý, mamandardy nesıelendirý, granttar bólý jáne jumysqa ornalastyrý.

«Birinshi baǵyt boıynsha iri kásiporyndarmen yntymaqtasa otyryp quzyrettilik ortalyqtary ashylǵan. Osynyń nátıjesinde, kolledj túlekteriniń 90 paıyzy jumysqa ornalastyryldy. Nesıeleýge qatysty aıtar bolsaq, kópbalaly jáne az qamtylǵan otbasylarǵa tórt paıyzben nesıe berilýde. Óteýsiz granttardy 2275 otbasy jeńip aldy», - dedi aımaq basshysy Danıal Ahmetov.

Úshinshi baǵyt aıasynda áleýmettik jumys oryndary qurylyp jatyr. Eldegi eńbek kúshi artyq óńirlerden qonys aýdarý jónindegi «Ońtústik-Soltústik» respýblıkalyq baǵdarlamasy da iske asyrylýda.

«Shyǵys Qazaqstanǵa 2017 jyldan bastap 3598 adam kóship keldi. Alaıda ókinishke qaraı, barlyǵy jumys kúshi qajet aýdandarǵa qonystanbady. Sondyqtan men qalalar men aýdandardyń ákimderine qonys aýdarǵan árbir otbasy - qaıda jumys isteıtini, qandaı jaǵdaıda turatyny týraly egjeı-tegjeıli esep daıyndaýdy tapsyrdym», - dedi oblys ákimi.